អូស្ត្រាលីនិយាយថា ខ្លួនកំពុងបង្កើនសមត្ថភាពការពារំីស៊ីលរបស់ខ្លួន ស្របពេលមាន "ក្តីបារម្ភយ៉ាងខ្លាំង" អំពីការសាកល្បងរបស់ចិន លើមីស៊ីលអន្តរទ្វីប ICBM នៅប៉ាស៊ីហ្វិកខាងត្បូង ហើយនឹងជំរុញឃ្លាំងអាវុធ និងការនាំចេញទៅកាន់ដៃគូសន្តិសុខ ខណៈតំបន់នេះឈានចូលដល់ "យុគសម័យមីស៊ីល" ថ្មី។

រដ្ឋមន្ត្រីក្រសួងឧស្សាហកម្មការពារជាតិ លោក ផាត ខនរ៉យ (Pat Conroy) បាននិយាយនៅក្នុងសុន្ទរកថានៅថ្ងៃពុធ (៣០ តុលា) នេះថា ប្រទេសអូស្ត្រាលី កំពុងបង្កើនការការពារមីស៊ីល និងសមត្ថភាពវាយប្រហាររយៈចម្ងាយឆ្ងាយ ហើយនឹងសហការជាមួយដៃគូសន្តិសុខដូចជាសហរដ្ឋអាមេរិក ជប៉ុន និងកូរ៉េខាងត្បូង ដើម្បីរួមចំណែកដល់ស្ថិរភាពក្នុងតំបន់។

លោក Conroy បានប្រាប់ក្លឹបសារព័ត៌មានជាតិនៅទីក្រុងកង់បេរ៉ាថា "ការប្រកួតប្រជែងរវាងសហរដ្ឋអាមេរិក និងចិន គឺជាចំណុចផ្ដោតសំខាន់ការបង្កើនសមត្ថភាពមីស៊ីលនេះ និងក្នុងបរិស្ថានសន្តិសុខអូស្រ្តាលី"។

ប្រទេសចិន បានបាញ់សាកល្បងមីស៊ីលបាលិស្ទិកអន្តរទ្វីប ICBM កាលពីខែកញ្ញា ដែលបានធ្វើដំណើរក្នុងចម្ងាយជាង ១១.០០០គីឡូម៉ែត្រ ដោយចុះចតនៅមហាសមុទ្រប៉ាស៊ីហ្វិក ឆ្ពោះទៅភាគឦសានអូស្ត្រាលី។ រដ្ឋមន្ត្រីក្រសួងឧស្សាហកម្មការពារជាតិទីក្រុងកង់បេរ៉ារូបនេះ សង្កត់ធ្ងន់ថា ឥណ្ឌូប៉ាស៊ីហ្វិក គឺស្ថិតនៅលើចំណុចកំពូលនៃយុគសម័យមីស៊ីលថ្មី ដែលមីស៊ីលក៏ត្រូវបានប្រើប្រាស់ជា "ឧបករណ៍នៃការបង្ខិតបង្ខំ" ផងដែរ៕