បើយោងតាមមន្ត្រីរបស់អង្គការសហប្រជាជាតិ (UN) បានឲ្យដឹងថា យុទ្ធនាការចាក់វ៉ាក់សាំងប្រឆាំងនឹងជំងឺស្វិតដៃជើង នៅតំបន់ហ្កាហ្សាស្ទ្រីបភាគខាងជើង ដែលត្រូវបានផ្អាក អំឡុងពេលមានការវាយលុកដោយយោធារបស់អ៊ីស្រាអែលនៅតំបន់នោះ កំពុងធ្វើឲ្យកុមារជិត ១២០.០០០នាក់ ទទួលបានតែការការពារផ្នែកខ្លះពីជំងឺនេះប៉ុណ្ណោះ។

អ្នកជំនាញ បានព្រមានថា ភាពជាប់គាំងនេះ ដែលបានធ្វើឲ្យបុគ្គលិកពេទ្យនៅទីនោះមិនអាចចែកចាយវ៉ាក់សាំងដូសសំខាន់លើកទី២ បានផ្ដល់ឱកាសឲ្យវីរុសឆ្លងរាលដាលនៅក្នុងតំបន់ហ្កាហ្សា និងចម្លងចូលទៅក្នុងប្រទេសជិតខាងដែលបានប្រឹងប្រែងយ៉ាងខ្លាំង ដើម្បីលុបបំបាត់ជំងឺនេះ។

លោកវេជ្ជបណ្ឌិត Hamid Jafari នាយកផ្នែកលុបបំបាត់ជំងឺស្វិតដៃជើងរបស់អង្គការសុខភាពពិភពលោក (WHO) សម្រាប់តំបន់មេឌីទែរ៉ាណេភាគខាងកើត បាននិយាយថា៖ «ភាគខាងជើងតំបន់ហ្កាហ្សា បានក្លាយជាទីកន្លែងអំណោយផលដល់វីរុសនេះ ហើយថា ទីកន្លែងដ៏សុវត្ថិភាពនោះ នឹងនៅតែមាន ប្រសិនបើអ្នកមិនអាចផ្ដល់វ៉ាក់សាំងគ្រប់ដូសដល់ក្មេងៗទាំងអស់ទេនោះ»។

ប្រសិនបើវីរុសនេះចរាចរនៅតំបន់ហ្កាហ្សាភាគខាងជើង សូម្បីតែអ្នកដែលទទួលបានថ្នាំបង្ការហើយនោះ ក្នុងនោះរួមទាំងទាហានអ៊ីស្រាអែល ឬបុគ្គលិកជំនួយ ក៏អាចឆ្លងវីរុសដែលមានហានិភ័យតិចតួច ចំពោះពួកគេដែរ ប៉ុន្តែអាចចម្លងវីរុសនោះទៅខាងក្រៅតំបន់ហ្កាហ្សា។ លោកវេជ្ជបណ្ឌិត Jafari បាននិយាយថា «នោះគឺជាហានិភ័យ»។

គួរបញ្ជាក់ថា អត្រាចាក់ថ្នាំបង្ការវីរុសនេះ នៅតំបន់ហ្កាហ្សា មានប្រហែល ៩៩ភាគរយ មុនពេលមានសង្គ្រាម ប៉ុន្តែបានធ្លាក់ចុះមកត្រឹម ៨៦ភាគរយ នៅពាក់កណ្តាលឆ្នាំ២០២៤៕