រដ្ឋាភិបាលចិន នៅថ្ងៃពុធ (ទី៣០ ខែតុលា) នេះ បានលើកឡើងថា ប្រសិនបើលោក Donald Trump ឈ្នះការបោះឆ្នោតជាប្រធានាធិបតីសហរដ្ឋអាមេរិកនោះ រូបលោកអាច «បោះបង់ចោល» កោះតៃវ៉ាន់ ដោយសារគោលនយោបាយរបស់ប្រទេសនេះ តែងតែយក «អាមេរិកជាចម្បងមុនអ្វីទាំងអស់»។

បេក្ខជនរបស់បក្សសាធារណរដ្ឋ លោក Trump ដែលកំពុងមានការប្រកួតប្រជែងយ៉ាងតានតឹង នៅក្នុងការបោះឆ្នោត ទល់នឹងអនុប្រធានាធិបតី លោកស្រី Kamala Harris របស់បក្សប្រជាធិបតេយ្យ បានធ្វើអត្ថាធិប្បាយជាច្រើនដង នៅលើផ្លូវនៃការធ្វើយុទ្ធនាការរបស់លោក ដោយនិយាយថា កោះតៃវ៉ាន់ដែលត្រូវបានទាមទារដោយចិន គួរតែចំណាយដើម្បីទទួលបានការការពារ ហើយចោទប្រកាន់កោះនេះថា បានលួចអាជីវកម្មបន្ទះអេឡិចត្រូនិករបស់អាមេរិក។

នៅពេលត្រូវបាបនសួរអំពីការលើកឡើងរបស់លោក Trump កាលពីដើមខែតុលា ដែលបាននិយាយថា លោកនឹងដំឡើងពន្ធបន្ថែមលើប្រទេសចិន ប្រសិនបើចិនត្រូវ «ចូលទៅក្រសោបកោះតៃវ៉ាន់» និងការកត់សម្គាល់ ដែលថា កោះតៃវ៉ាន់ត្រូវចំណាយលើការការពារ អ្នកនាំពាក្យការិយាល័យទទួលបន្ទុកកិច្ចការកោះតៃវ៉ាន់របស់ចិន បាននិយាយថា អ្នកស្រុកកោះតៃវ៉ាន់យល់ដឹងយ៉ាងច្បាស់លាស់ អំពីគោលនយោបាយរបស់សហរដ្ឋអាមេរិក។

គួរបញ្ជាក់ថា សហរដ្ឋអាមេរិកត្រូវបានចងដោយច្បាប់ ក្នុងការផ្តល់ឲ្យកោះតៃវ៉ាន់នូវមធ្យោបាយការពារខ្លួន ទោះបីជាគ្មានទំនាក់ទំនងការទូតផ្លូវការណាមួយ រវាងក្រុងវ៉ាស៊ីនតោន និងទីក្រុងតៃប៉ិក៏ដោយ។

តែយ៉ាងណាក្ដី នៅក្នុងបទសម្ភាសន៍ជាផតឃែស្ថ កាលពីចុងសប្តាហ៍ ក្នុងកម្មវិធី «The Joe Rogan Experience» លោក Trump បានបញ្ជាក់ជាថ្មីម្តងទៀតនូវការអះអាងរបស់លោក អំពីកោះតៃវ៉ាន់ ដែលថា «លួចយក» អាជីវកម្មបន្ទះឈីបរបស់សហរដ្ឋអាមេរិក ហើយត្រូវចំណាយ ដើម្បីទទួលបានការការពារ៕