កោះកុង៖ ក្រសួងដែនដី នគរូបណីយកម្ម និងសំណង់ និងរដ្ឋបាលខេត្តកោះកុង បន្តផ្តល់ការដោះស្រាយគោលនយោបាយ របស់រាជរដ្ឋាភិបាលដល់ប្រជាពលរដ្ឋជាង ៨០០គ្រួសារ គ្រាមានវិវាទជាមួយក្រុមហ៊ុនញូញៀនជាង ១០ឆ្នាំមក។

ពលរដ្ឋចំនួន ៨៣១គ្រួសារ រស់នៅក្នុងឃុំកោះស្តេច ឃុំភ្ញីមាស ស្រុកគិរីសាគរ និងឃុំតានូន ស្រុកបុទុមកសាគរ បន្តស្ម័គ្រចិត្តចូលខ្លួនមកចាប់ឆ្នោតយកទីតាំងដីឡូតិ៍ ព្រមទាំងធ្វើកិច្ចសន្យានៅចំពោះសាម៉ីក្រសួង និងអាជ្ញាធររដ្ឋបាល ដើម្បីទទួលសំណងជាដីធ្លីចំនួន ១ហិកតាបន្ថែម។

លោក សុខ សុទ្ធី អភិបាលរងខេត្តកោះកុង គូសបញ្ជាក់ល្ងាចថ្ងៃទី១៤ ខែតុលាថា ពលរដ្ឋខាងលើគឺត្រូវបានចាត់ទុកថា ប្រជាពលរដ្ឋប្រភេទទី៣ដែលមានអាទិភាពក្នុងគោលដៅដោះស្រាយបញ្ចប់វិវាទជាស្ថាពររវាងក្រុមហ៊ុនញូញៀន បន្ទាប់ពីពលរដ្ឋចំនួន ២៥៥នាក់ កិច្ចសន្យាយកសំណងរួចរាល់ហើយតបនឹងគោលនយោបាយរបស់រាជរដ្ឋាភិបាលកម្ពុជា៕ អត្តបទ៖ ឈឹម មករា​