រដ្ឋមន្ត្រីការបរទេសអ៊ីរ៉ង់ លោក សេយីដ អាបាស អារ៉ាជី (Seyyed Abbas Araghchi) បាននិយាយកាលពីថ្ងៃអង្គារថា អ៊ីស្រាអែលនឹងទទួលរងផលវិបាកសម្រាប់ការវាយប្រហារអ៊ីរ៉ង់។ នេះបើយោងតាមសេចក្តីថ្លែងការណ៍មួយចេញផ្សាយដោយក្រសួងការបរទេសអ៊ីរ៉ង់។

នៅឯកិច្ចប្រជុំនៅរដ្ឋធានីតេអេរ៉ង់ជាមួយឯកអគ្គរដ្ឋទូត និងប្រធានបេសកកម្មការទូត ការិយាល័យអង្គការសហប្រជាជាតិ និងអង្គការអន្តរជាតិនានា ក្នុងប្រទេសអ៊ីរ៉ង់ លោក អារ៉ាជី បានថ្លែងថា អ៊ីស្រាអែល និង «អ្នកជំរុញ» មិនអាចចៀសវាងការទទួលខុសត្រូវផ្នែកនយោបាយ និងផ្លូវច្បាប់សម្រាប់ការឈ្លានពានលើដីអ៊ីរ៉ង់ ហើយត្រូវតែទទួលខុសត្រូវ។

លោកបាននិយាយថា អ៊ីរ៉ង់ «បានរក្សាសិទ្ធិស្របច្បាប់របស់ខ្លួនទាំងស្រុង ក្នុងការឆ្លើយតបយ៉ាងត្រឹមត្រូវចំពោះការឈ្លានពានច្បាស់លាស់បែបនេះ» ខណៈពេលដែលសង្កត់ធ្ងន់ថា អ៊ីរ៉ង់នឹងមិនស្ទាក់ស្ទើរ ក្នុងការធ្វើដូច្នេះ ឬធ្វើសកម្មភាពដោយប្រញាប់ប្រញាល់នោះទេ។

នៅក្នុងកិច្ចពិភាក្សា លោក អារ៉ាជី បាននិយាយថា ដោយសារ«ការត្រៀមខ្លួន និងការប្រុងប្រយ័ត្នរបស់កងកម្លាំងប្រដាប់អាវុធ និងការអនុវត្តទាន់ពេលវេលានៃការការពារដែនអាកាសរបស់ប្រទេស» ទើបអ៊ីរ៉ង់បាន«បញ្ឈប់ការឈ្លានពាននេះ»។