រដ្ឋមន្រ្តីក្រសួងដឹកជញ្ជូនប៉េរូលោក Raul Perez និយាយកាលពីថ្ងៃអង្គារថា រដ្ឋាភិបាលរបស់លោកនឹងស្វែងរកភាពជាដៃគូជាមួយរដ្ឋាភិបាលបរទេស ដើម្បីកសាងផ្លូវរថភ្លើងតម្លៃ ១០ពាន់លានដុល្លារ ដែលជាផ្នែកមួយនៃគម្រោងអភិវឌ្ឍន៍ធំផ្តោតសំខាន់លើកំពង់ផែ Chancay ដែលគ្រោងនឹងសម្ពោធន៍ដាក់ឲ្យប្រើប្រាស់ក្នុងពេលឆាប់ៗខាងមុខនេះ ។

លោក Perez និយាយប្រាប់សន្និសីទសារព័ត៌មាននៅទីក្រុង Chancaស្ថិតតាមតំបន់ឆ្នេរមហាសមុទ្រប៉ាស៊ីហ្វិកស្ថិតភាគកណ្តាលប្រទេសប៉េរូថា គម្រោងនេះ ជាប់ពាក់ព័ន្ធនឹងការសាងសង់ផ្លូវរថភ្លើង ២ខ្សែ ដែល ១ខ្សែតភ្ជាប់តំបន់ភាគខាងត្បូងរដ្ឋធានី Lima ទៅកាន់ទីក្រុង Ica និង ១ខ្សែទៀត តភ្ជាប់ទៅកាន់ទីក្រុង Barranca នៅភាគខាងជើង ។

រដ្ឋាភិបាលប៉េរូ គ្រោងនឹងដាក់ជូនការងារនេះដល់ក្រុមមន្រ្តីមកពីប្រទេសចិន សហរដ្ឋអាមេរិក អង់គ្លេស កាណាដា បារាំង និងជប៉ុន ពេលដែលក្រុមតំណាងជួបជុំគ្នានៅទីក្រុង Limaនាខែក្រោយ សម្រាប់កិច្ចប្រជុំកំពូលកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក ។

កំពង់ផែ Chancay ដែលក្រុមអាជ្ញាធរសង្ឃឹមថា នឹងក្លាយជាមជ្ឈមណ្ឌលដឹកជញ្ជូនដ៏សំខាន់សម្រាប់ពាណិជ្ជកម្មអាមេរិកខាងត្បូង-អាស៊ីនោះ នឹងសម្ពោធន៍ដាក់ឲ្យប្រើប្រាស់នៅពាក់កណ្តាលខែវិច្ឆិកាខាងមុខនេះ ហើយភ្លាមៗនោះ វានឹងចាប់ផ្តើមដឹកជញ្ជូនកុងតឺន័រទៅកាន់ទីក្រុងសៀងហៃ របស់ប្រទេសចិន ៕