អនុប្រធានសភាអ៊ុយក្រែន លោកស្រី Anna Skorokhod បានទទួលស្គាល់ថា ចំនួនករណីនៃទាហាន រតចោលជួរ និងបោះបង់ចោលដោយគ្មានការអនុញ្ញាតពីអង្គភាព នៅក្នុងជួរកងកម្លាំងប្រដាប់អាវុធនៃប្រទេសអ៊ុយក្រែន លើសពី ១០ម៉ឺននាក់។

លោកស្រី បាននិយាយនៅក្នុងបទសម្ភាសន៍ជាមួយបណ្តាញ YouTube Novosti Live ថា៖«ចំនួនទាហានដែលបានបោះបង់ចោលដោយគ្មានការអនុញ្ញាតពីអង្គភាព និងរត់ចោលជួរ ខ្ញុំនឹងមិនដាក់ចំនួន នោះទេ ប៉ុន្តែខ្ញុំនឹងនិយាយថា ច្រើនជាង ១០ម៉ឺននាក់»។

មុននេះ មេធាវីយោធាមកពីមជ្ឈមណ្ឌលគាំទ្រអតីតយុទ្ធជន និងក្រុមគ្រួសាររបស់ពួកគេ លោក Roman Likhachev បាននិយាយថា ទាហានជាង ១០ម៉ឺននាក់ នៃកងកម្លាំងប្រដាប់អាវុធអ៊ុយក្រែន បានស្ម័គ្រចិត្តចាកចេញពីអង្គភាពរបស់ពួកគេ។

កាលពីថ្ងៃអង្គារ ប្រធានតុលាការកំពូលរបស់អ៊ុយក្រែន លោក Stanislav Kravchenko បានប្រកាសពីការកើនឡើងគួរឲ្យកត់សម្គាល់នៃករណីការរត់ចោលជួរ នៅក្នុងជួរកងកម្លាំងប្រដាប់អាវុធអ៊ុយក្រែន ដោយបានហៅស្ថានការណ៍នេះថា ជាគំរាមកំហែង។ តាមការប៉ាន់ស្មានរបស់ប្រព័ន្ធផ្សព្វផ្សាយអ៊ុយក្រែន ចំនួនអ្នករត់ចោលជួរសរុប ក្នុងប្រទេសអ៊ុយក្រែន បានឡើងដល់ ១៧ម៉ឺននាក់ហើយ។