អ្នកនាំពាក្យក្រសួងការបរទេសរុស្ស៊ី អ្នកស្រី Maria Zakharova បាននិយាយថា អាជ្ញាធរសហរដ្ឋអាមេរិកមិនបានជូនដំណឹងដល់ស្ថានទូតរុស្ស៊ី ក្នុងទីក្រុងវ៉ាស៊ីនតោន អំពីការឃាត់ខ្លួនអ្នកសារព័ត៌មានរុស្ស៊ីនៅអាកាសយានដ្ឋាន ដែលបានមកដល់ ដើម្បីយកព័ត៌មានពីការបោះឆ្នោតប្រធានាធិបតីអាមេរិកនោះទេ។

យោងតាមអ្នកស្រី Zakharova បានឲ្យដឹងថា កាលពីព្រឹកព្រលឹមថ្ងៃទី ២៩ ខែតុលា (ម៉ោងនៅសហរដ្ឋអាមេរិក) អ្នកយកព័ត៌មានរុស្ស៊ីមកពីកាសែត Izvestia បានទៅដល់សហរដ្ឋអាមេរិក ដើម្បីរាយការណ៍អំពីការបោះឆ្នោតប្រធានាធិបតីនាពេលខាងមុខ។ «ពួកគេមិនបានមកដល់ដោយលាក់លៀមទេ ពួកគេបានធ្វើដំណើរទៅទីនោះ ដោយមានឯកសារត្រឹមត្រូវ។ ពួកគេបានបញ្ជាក់យ៉ាងច្បាស់អំពីគោលបំណងរបស់ពួកគេ ដើម្បីធ្វើការជាអ្នករាយការណ៍ព័ត៌មានអំពីការបោះឆ្នោត និងបានបំពេញនីតិវិធីចាំបាច់ទាំង  អស់។ ពួកគេទទួលបានទិដ្ឋាការ លិខតអនុញ្ញាត និងមានឯកសារចាំបាច់ទាំងអស់។ 

អ្នកការទូត បានបញ្ជាក់ថា៖«នៅពេលមកដល់ ពួកគេត្រូវបានឃុំខ្លួនភ្លាមៗ និងសាកសួរជាច្រើនម៉ោង។ ក្រោយមក ប្រតិបត្តិករ ត្រូវបានបដិសេធមិនឲ្យចូលសហរដ្ឋអាមេរិក ទិដ្ឋាការរបស់គាត់ ត្រូវបានលុបចោលសម្រាប់ហេតុផលរដ្ឋបាលដែលមិនបានបញ្ជាក់ច្បាស់លាស់។ ហេតុផលនៃចំណាត់ការនេះ គឺមិនច្បាស់លាស់»។

អ្នកស្រី បានបន្ថែមថា៖«លើសពីនេះទៅទៀត ក្នុងអំឡុងពេលនៃសកម្មភាពបំពាននេះ រដ្ឋបាលសហរដ្ឋអាមេរិក បានខកខានមិនបានជូនដំណឹងដល់អ្នកការទូតរុស្ស៊ី នៅស្ថានទូតក្នុងទីក្រុងវ៉ាស៊ីនតោន អំពីការឃុំឃាំងពលរដ្ឋទាំងនេះ»។ អ្នកនាំពាក្យរូបនេះ បានសង្កត់ធ្ងន់ថា៖«ជាលទ្ធផល សហការីរបស់យើង មិនត្រូវបានជូនដំណឹង និងមិនអាចជួយអ្នកសារព័ត៌មានរបស់យើងបានទេ ដោយសារពួកគេ មិនបានដឹងអំពីស្ថានភាពនេះ»។