​

ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសពីការចាប់ផ្តើមសមយុទ្ធកម្លាំងការពារជាយុទ្ធសាស្ត្ររបស់រុស្ស៊ី រួមទាំងការបាញ់សាកល្បងមីស៊ីលបាលីស្ទីកមានសមត្ថភាពបំពាក់នុយក្លេអ៊ែផងដែរ។ លោក ពូទីន បានធ្វើសេចក្តីប្រកាសនៅថ្ងៃអង្គារនេះ។ លោកនិយាយថា សមយុទ្ធ រួមបញ្ចូលទាំងការបាញ់មីស៊ីលបាលីស្ទីក និងមីស៊ីលស៊ីបគោលដៅ។

លោកពូទីន បានសង្កត់ធ្ងន់លើសារៈសំខាន់នៃការមាន «កងកម្លាំងយុទ្ធសាស្ត្រទំនើប និងត្រៀមអនុវត្តគ្រប់ពេល» ដោយសារតែភាពតានតឹងផ្នែកភូមិសាស្ត្រនយោបាយកំពុងកើនឡើង និងការលេចឡើងការគំរាមកំហែង និងហានិភ័យពីខាងក្រៅថ្មីៗ។

ក្រសួងការពារជាតិរុស្ស៊ី បានប្រកាសពីភាពជោគជ័យនៃសមយុទ្ធ ដោយបាននិយាយថា មីស៊ីលបាលីស្ទីកអន្តរទ្វីប Yars ត្រូវបានបាញ់ចេញពីទីតាំងយានអវកាស Plesetsk Cosmodrome នៅភាគខាងជើងប្រទេសរុស្ស៊ី។

ក្រសួង ក៏បាននិយាយថា មីស៊ីលបាលីស្ទីក Sineva និងមីស៊ីលបាលីស្ទីកអន្តរទ្វីប Bulava ត្រូវបានបាញ់ចេញពីនាវាមុជទឹកនុយក្លេអ៊ែរនៅសមុទ្រ Barents និងសមុទ្រ Okhotsk។

ក្រសួងបានអះអាងថា មីស៊ីលទាំងអស់បានធ្លាក់ទៅដល់គោលដៅរបស់វា ហើយបេសកកម្មទាំងអស់នៅក្នុងសមយុទ្ធនេះ បានបញ្ចប់ទៅយ៉ាងល្អ។