ទីភ្នាក់ងារការងារជំនួយអង្គការសហប្រជាជាតិ(UNRWA)ក្នុងប្រទេសលីបង់ នៅតែបន្តប្រតិបត្តិការពេញលេញដដែល ។ នេះបើយោងតាមការអះអាងរបស់ប្រធានទទួលបន្ទុកកិច្ចការទីភ្នាក់ងារមួយនេះនៅក្នុងប្រទេសលីបង់ បានឲ្យដឹងកាលពីថ្ងៃអង្គារ ។

អ្នកស្រី Dorothee Klaus គឺជាប្រធានផ្នែកទទួលបន្ទុកកិច្ចការរបស់ទីភ្នាក់ងារ UNRWA នៅប្រទេសលីបង់ និយាយប្រាប់ក្រុមអ្នកសារព័ត៌មានថា ទីភ្នាក់ងារ UNRWA នៅក្នុងប្រទេសលីបង់ បន្តប្រតិបត្តិការយ៉ាងពេញលេញជាមួយនឹងកម្មវិធីទៀងទាត់របស់ពួកគេ ក៏ដូចជាឆ្លើយតបនឹងវិបត្តិមនុស្សធម៌បច្ចុប្បន្ន ។

ច្បាប់អនុម័តដោយអ៊ីស្រាអែលកាលពីថ្ងៃចន្ទ ដើម្បីហាមឃាត់ទីភ្នាក់ងារជនភៀសខ្លួនប៉ាឡេស្ទីនរបស់អង្គការសហប្រជាជាតិ(UN)មួយនេះ ពីប្រតិបត្តិការនៅអ៊ីស្រាអែល បង្កឲ្យមានក្តីបារម្ភពីសមត្ថភាពរបស់ពួកគេ និងការផ្តល់ជំនួយសង្រ្គោះមនុស្សធម៌ ដល់តំបន់ហ្កាហ្សា រយៈពេលជាង ១ឆ្នាំក្រោយសង្រ្គាម ផ្ទុះឡើង ។

ទីភ្នាក់ងារមួយនេះ ដែលជួលបុគ្គលិករាប់ម៉ឺននាក់ នៅតំបន់ហ្កាហ្សា បានផ្តល់ជំនួយដល់ពលរដ្ឋស្ទើតែទាំងអស់នៅក្នុងដែនដីបិទច្រកតំបន់ឆ្នេរមួយនេះ ជាមួយនឹងការផ្គត់ផ្គង់មូលដ្ឋាន និងការចូលដល់តម្រូវការបន្ទាន់ ឆ្លងកាត់តាមអ៊ីស្រាអែល ។

ទីភ្នាក់ងារ UNRWA ត្រូវបានបង្កើតឡើងនៅក្នុងឆ្នាំ ១៩៤៩ តាមរយៈសេចក្តីសម្រេចរបស់មហាសន្និបាត UN បន្ទាប់ពីសង្រ្គាមជុំវិញការបង្កើតប្រទេសអ៊ីស្រាអែល ពេលដែលជនប៉ាឡេស្ទីន ៧០ម៉ឺននាក់ បានរត់ភៀសខ្លួន និងចាកចេញពីផ្ទះសម្បែងរបស់ពួកគេ ។

ក្រុមតំណាងរាស្រ្តអ៊ីស្រាអែល ដែលបានធ្វើសេចក្តីស្នើច្បាប់ បានលើកឡើងពីការជាប់ពាក់ព័ន្ធនឹងទីភ្នាក់ងារ UNRWA នៅក្នុងការវាយប្រហារកាលពីថ្ងៃទី ៧ ខែតុលា លើតំបន់ភាគខាងត្បូងអ៊ីស្រាអែល ហើយបុគ្គលិករបស់ពួកគេ គឺជាសមាជិករបស់ក្រុមហាម៉ាស់ និងក្រុមប្រដាប់អាវុធផ្សេងទៀត ៕