ក្រុមហេសបូឡាដែលគាំទ្រដោយអ៊ីរ៉ង់ បានប្រកាសកាលពីថ្ងៃអង្គារអំពីការជ្រើសរើសលោក Sheikh Naim Qassem ជាអគ្គលេខាធិការថ្មីរបស់ខ្លួន។ លោកស្នងតំណែងពីលោក Hassan Nasrallah ដែលត្រូវបានសម្លាប់ នៅក្នុងការវាយប្រហារតាមអាកាសរបស់អ៊ីស្រាអែល សំដៅលើទីស្នាក់ការកណ្តាលរបស់គាត់នៅក្នុងទីក្រុង Haret Hreik ជាជាយក្រុងនៃភាគខាងត្បូងទីក្រុងបេរូត កាលពីថ្ងៃទី ២៧ ខែកញ្ញា។

ការប្រឈមមុខដាក់គ្នារវាងក្រុមហេសបូឡា និងទាហានអ៊ីស្រាអែល បានរីករាលដាលនៅតាមព្រំដែនរវាងប្រទេសលីបង់ និងអ៊ីស្រាអែល ជាពិសេសនៅក្នុងទីប្រជុំជន Khiam ដោយមានអ្នកស្លាប់ និងរបួសជាច្រើនដែលបណ្តាលមកពីការវាយឆ្មក់យ៉ាងខ្លាំងក្លា នៅទូទាំងភាគខាងត្បូង និងជ្រលងភ្នំ Bekaa។

បន្ទាប់ពីការប្រកាសការជ្រើសរើសលោក Qassem មក អ៊ីស្រាអែលបានបង្កើនប្រតិបត្តិការយន្តហោះឈ្លបយកការណ៍របស់ខ្លួន នៅក្នុងដែនអាកាសលើទីក្រុងបេរូត និងជាយក្រុងភាគខាងត្បូងរបស់ខ្លួន នៅ  រយៈកម្ពស់ទាប។

រដ្ឋន្ត្រីការពារជាតិអ៊ីស្រាអែល Yoav Gallant បានបង្ហោះរូបភាពរបស់លោក Qassem នៅលើគណនី X របស់ខ្លួន ហើយបានសរសេរថា៖«ការរាប់ថយក្រោយចំពោះការតែងតាំងរបស់គាត់ បានចាប់ផ្តើមហើយ» ។