បាល់ទាត់៖ ពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ខេត្ត) ឆ្នាំ២០២១ នឹងបន្ដការប្រកួតវគ្គ ៨ក្រុមចុងក្រោយនៅថ្ងៃទី១៦ និងថ្ងៃទី១៧ ខែតុលាចុងសប្ដាហ៍នេះហើយ ក្រោយបញ្ចប់ការប្រកួតជម្រុះតាមពូលកាលពីថ្មីៗកន្លងទៅ។ ចំពោះកម្មវិធីប្រកួតនៅថ្ងៃទី១៦-តុលា រួមមានខេត្តកណ្ដាលត្រូវក្រុម ស.ស.យ.ក ខេត្តបាត់ដំបងនៅកីឡដ្ឋានសេវេនអេនជី និងក្រុមមន្ទីរអប់រំ យុវជន និងកីឡាខេត្តត្បូងឃ្មុំជួបក្រុមចំណូលថ្មីភ្នំពេញហ្គាឡាក់ស៊ីនៅកីឡដ្ឋាន AEU Sport Park នាវេលាម៉ោង ៣រសៀលដូចគ្នា។
រីឯការប្រកួតនៅថ្ងៃទី១៧-តុលាវិញមាន ២គូដូចគ្នាគឺក្រុមសៀមរាបអេហ្វស៊ីជួបខេត្តបន្ទាយមានជ័យនៅកីឡដ្ឋានខេមបូឌាអ៊ែរវ៉េ និងក្រុមមន្ទីរអប់រំ យុវជន និងកីឡាខេត្តកំពង់ឆ្នាំងជួបក្រុមកោះកុងអេហ្វស៊ី នៅកីឡដ្ឋានកងយោធពលខេមរភូមិន្ទនាវេលាម៉ោង ៣រសៀលដូចគ្នា។ សម្រាប់ការប្រកួតវគ្គ ៨ក្រុមចុងក្រោយនេះនឹងធ្វើឡើងតែ ១ជើងប៉ុណ្ណោះនៅលើទឹកដីកណ្ដាល ដែលសុទ្ធតែជាកីឡដ្ឋានរបស់ក្លិបក្របខណ្ឌលីគកំពូលកម្ពុជា ដើម្បីកាត់សេចក្ដីរកបេក្ខភាពវគ្គពាក់កណ្ដាលផ្ដាច់ព្រ័ត្រ ហើយក្នុងចំណោម ៤ប្រកួតនេះ ក្រុមការងារទូរទស្សន៍ BTV-News ក៏នឹងធ្វើការផ្សាយផ្ទាល់ចំនួន ២គូផងដែរគឺខេត្តត្បូងឃ្មុំជួបក្រុមភ្នំពេញហ្គាឡាក់ស៊ី និងខេត្តកំពង់ឆ្នាំងជួបក្រុមកោះកុងអេហ្វស៊ី៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
