ជីវិតរបស់លោក Ali Haider Ahmed ប្រែជាខុសពីមុន ពេលដែលអ៊ីស្រាអែល បើកការវាយប្រហារលើប្រទេសលីបង់កាលពីខែកញ្ញា ។

កាលពីមុនលោកធ្វើការនៅក្នុងរោងម៉ាស៊ីនអារឈើ ប៉ុន្តែបច្ចុប្បន្នលោកប្រែក្លាយជីវិតរបស់លោកទៅជាអ្នកជួយជនភៀសខ្លួនរាប់ម៉ឺននាក់ ឆ្លងកាត់ព្រំដែនលីបង់ ចូលទៅកាន់ប្រទេសស៊ីរី ។ លោករស់នៅក្រៅរថយន្តរបស់លោកនៅច្រកព្រំដែន Al Masnaa ។

ចាប់ពីពេលព្រឹករហូតដល់យប់ លោកបើករថយន្តត្រឡប់ចុះ-ឡើងរវាងប្រទេសទាំង ២ ដឹកជញ្ជូនជនភៀសខ្លួនឆ្លងកាត់កំណាត់ផ្លូវខ្លី តែគ្រោះថ្នាក់ដែលមានចម្ងាយប្រហែលជាង ១,៥គ.មប៉ុណ្ណោះ ។

លោកនិយាយថា លោកយល់ឃើញថា វាគ្មានសុវត្ថិភាពទាល់តែសោះ ពីព្រោះថា ពួកយើងធ្វើការ ខណៈព្រួយបារម្ភឥតឈប់ឈរពីពេលដែលយន្តហោះនឹងវាយប្រហារ ហើយនិងពេលណា ពួកគេនឹងវាយប្រហារលើពួកយើង ។

លោកថា ពួកយើងតែងតែព្រួយបារម្ភ ហើយគ្រួសាររបស់ពួកយើងបានជម្លៀសខ្លួនទៅកាន់ប្រទេសស៊ីរីអស់ហើយ ពួកយើងគ្រាន់តែចង់ឲ្យស្ថានភាពបែបនេះបញ្ចប់ប៉ុណ្ណោះ ដើម្បីឲ្យពួកយើងអាចសម្រាក និងរស់នៅក្នុងផ្ទះរបស់ពួកយើងបាន ។

នៅដើមខែនេះ ការវាយប្រហារ បានធ្វើឲ្យច្រកព្រំដែនសំខាន់ Masnaa ផ្អាកសេវាកម្មបណ្តោះអាសន្ន ។ វាបានធ្វើឲ្យច្រកព្រំដែននៅភាគខាងជើងលីបង់ ក្លាយជាច្រកចេញតែមួយគត់ ចូលទៅកាន់ប្រទេសស៊ីរី ។ ទោះបីជាប្រឈមហានិភ័យខ្លាំងយ៉ាងណាក្តី លោក Ali នៅតែបន្តការងាររបស់លោក ។

លោកនិយាយទៀតថា លោកត្រូវតែធ្វើការ ដើម្បីឲ្យលោកអាចផ្តល់ប្រាក់កាសដល់គ្រួសាររបស់លោកបាន ។ លោកត្រូវតែធ្វើការ បើសិនជាលោកមិនធ្វើការទេនោះ លោកនឹងគ្មានអ្វីទទួលទាននោះឡើយ ហើយនៅទីនេះ យើងត្រូវការចាក់សាំងរថយន្ត ៣០ដុល្លារ វាពិបាករកប្រាក់ ៣០ដុល្លារមកវិញខ្លាំងណាស់ ។

ក្រុមអាជ្ញាធរទីក្រុងបេរូត និយាយថា ការវាយប្រហាររបស់អ៊ីស្រាអែលលើប្រទេសលីបង់ បានសម្លាប់មនុស្សជាង ២.៥០០នាក់ និងមនុស្ស ១,២លាននាក់ផ្សេងទៀត ជម្លៀសខ្លួន បង្កឲ្យកើតមានវិបត្តិមនុស្សធម៌ ៕