កោះតៃវ៉ាន់ បានបិទក្រុងនានា មុនពេលការមកដល់នៃព្យុះទីហ្វុងកងរី(Kong-rey) នៅថ្ងៃព្រហស្បតិ៍ ទី៣១ ខែតុលានេះ ដោយទីក្រុងនិងតំបន់ទាំងអស់ប្រកាសថ្ងៃឈប់សម្រាក ហើយទីផ្សារហិរញ្ញវត្ថុក៏បានបិទ ខណៈជើងហោះហើរក្នុងស្រុកជាច្រើនត្រូវបានលុបចោល សម្រាប់អ្វីដែលត្រូវបានគេរំពឹងថានឹងជាព្យុះធំបំផុតក្នុងរយៈពេល៣០ឆ្នាំកន្លងទៅនេះ។

យោងតាមរដ្ឋបាលអាកាសធាតុកណ្តាលរបស់កោះតៃវ៉ាន់ បានឱ្យដឹងថា ព្យុះនេះត្រូវបានគេព្យាករណ៍ថានឹងបោកបក់ដល់ដីគោកនៅតំបន់ភ្នំ និងឆ្នេរសមុទ្រភាគខាងកើតដែលមានប្រជាជនរស់នៅដាច់ៗពីគ្នា នៅពេលថ្ងៃត្រង់នេះ ដោយមានកម្លាំងខ្យល់បក់និងភ្លៀងធ្លាក់ខ្លាំង ដែលនឹងធ្វើឲ្យប៉ះពាល់ដល់កោះនេះ ស្ទើរតែទាំងអស់។

អាជ្ញាធរ និយាយថា ក្រសួងការពារជាតិ បានដាក់ពង្រាយទាហានចំនួន ៣៦.០០០នាក់ រង់ចាំដើម្បីជួយដល់កិច្ចខិតខំប្រឹងប្រែងសង្គ្រោះ ខណៈមនុស្ស ៤.៥០០នាក់ ត្រូវបានជម្លៀសចេញពីតំបន់ដែលមានហានិភ័យខ្ពស់ ឲ្យបានមុនពេលព្យុះមកដល់។ ជាមួយគ្នានេះ រដ្ឋាភិបាល បានព្រមានប្រជាជនឲ្យនៅឆ្ងាយពីភ្នំ និងឆ្នេរសមុទ្រ។

ព្យុះទីហ្វុងកងរី(Kong-rey) ត្រូវបានគេព្យាករថានឹងចុះខ្សោយ នៅពេលដែលវាឆ្លងកាត់ភាគកណ្តាលកោះតៃវ៉ាន់ និងក្រោយមក បក់ចូលទៅច្រកសមុទ្រតៃវ៉ាន់ ហើយក៏នឹងបោកបក់ទៅប្រទេសចិន នៅព្រឹកថ្ងៃសុក្រ។