ក្រុមគ្រូពេទ្យប៉ាឡេស្ទីននិយាយថា អ៊ីស្រាអែល បានបន្តវាយលុកតំបន់ហ្កាហ្សាស្ទ្រីប ជាមួយនឹងការទម្លាក់គ្រាប់បែកថ្មីដែលបានសម្លាប់មនុស្សយ៉ាងហោចណាស់ ៣០នាក់ កាលពីថ្ងៃពុធ (៣០ តុលា) មួយថ្ងៃបន្ទាប់ពីការវាយប្រហារដ៏បង្ហូរឈាមបំផុតមួយនៃសង្រ្គាមអាយុកាលជាង ១ឆ្នាំ ខណៈអ្នកស្រុកនៅតំបន់នានាក្នុងភាគខាងជើង ចេញការអង្វរករសុំជំនួយពីអន្តរជាតិ។

ជនរងគ្រោះចំនួន ៨នាក់កាលពីថ្ងៃពុធ ត្រូវបានសម្លាប់ក្នុងការវាយប្រហារលើតំបន់ សាឡាទីន (Salateen) នៃក្រុង បេត ឡាហ៊ីយ៉ា (Beit Lahiya) ភាគខាងជើងហ្កាហ្សា។ តំបន់នេះគឺនៅជិតកន្លែងដែលក្រុមគ្រូពេទ្យនិយាយថា មនុស្សជាង ១០០នាក់ ត្រូវបានសម្លាប់កាលពីថ្ងៃអង្គារមុននោះ ក្នុងការវាយប្រហារដែលទីក្រុងវ៉ាស៊ីនតោន បានហៅថា "ជារឿងដ៏រន្ធត់"។

យុទ្ធនាការយោធារបស់អ៊ីស្រាអែល ដែលបានបំផ្លាញតំបន់ហ្កាហ្សាស្ទើតែទាំងមូល និងសម្លាប់មនុស្សរាប់ម៉ឺននាក់ មិនបង្ហាញសញ្ញានៃការបន្ធូរបន្ថយទេ ស្របពេលដែលអ៊ីស្រាអែល ធ្វើសង្រ្គាមថ្មីមួយប្រឆាំងនឹងក្រុមហេសបូឡា ដែលគាំទ្រដោយអ៊ីរ៉ង់ នៅក្នុងប្រទេសលីបង់ ហើយអ្នកគាំទ្ររបស់ខ្លួន គឺសហរដ្ឋអាមេរិក បានបន្តព្យាយាមធ្វើកិច្ចចរចាបទឈប់បាញ់រវាងភាគីទាំងពីរ។

តំបន់ហ្កាភាគខាងជើង ជាទីដែលអ៊ីស្រាអែលធ្លាប់និយាយកាលពីខែមករាថា ខ្លួនបានរុះរើរចនាសម្ព័ន្ធបញ្ជាការរបស់ក្រុមសកម្មប្រយុទ្ធ ហាម៉ាស រួចហើយនោះ បច្ចុប្បន្ននេះគឺជាចំណុចផ្តោតនៃការវាយប្រហាររបស់យោធា។ អ៊ីស្រាអែលបានបញ្ជូនរថក្រោះចូលទៅក្នុងតំបន់ បេត ឡាហ៊ីយ៉ា (Beit Lahiya), បេត ហានួន (Beit Hanoun) និង ចាបាលីយ៉ា (Jabalia) កាលពីដើមខែនេះ ដើម្បីតាមប្រម៉ាញ់ក្រុមយុទ្ធជនហាម៉ាស ដែលខ្លួននិយាយថា បានប្រមូលផ្តុំគ្នាឡើងវិញនៅក្នុងតំបន់ទាំងនោះ៕