ប្រមុខការពារជាតិសហរដ្ឋអាមេរិក និងកូរ៉េខាងត្បូង កាលពីថ្ងៃពុធ បានអំពាវនាវឱ្យកូរ៉េខាងជើង ដកកងទ័ពរបស់ខ្លួនចេញពីប្រទេសរុស្ស៊ី ដែលទីក្រុងវ៉ាស៊ីនតោន និយាយថា កងទ័ពប្រហែល ១០.០០០ នាក់ ត្រូវបានដាក់ពង្រាយសម្រាប់សកម្មភាពដែលអាចកើតមាន ប្រឆាំងកងកម្លាំងអ៊ុយក្រែន។

រុស្ស៊ី និងកូរ៉េខាងជើង បានពង្រឹងសម្ព័ន្ធភាពនយោបាយនិងយោធារបស់ប្រទេសទាំងពីកាន់តែស៊ីជម្រៅ ខណៈសង្រ្គាមនៅអ៊ុយក្រែនបានអូសបន្លាយពេល ប៉ុន្តែការបញ្ជូនកងទ័ពរបស់ទីក្រុងព្យុងយ៉ាង ទៅប្រយុទ្ធជាមួយកងកម្លាំងរបស់ទីក្រុងគីវ នឹងបង្ហាញពីការរីកធំនៃជម្លោះគួរឱ្យកត់សម្គាល់ដែលបង្កឱ្យមានការព្រួយបារម្ភជាអន្តរជាតិ។

រដ្ឋមន្ត្រីការពារជាតិសហរដ្ឋអាមេរិក លោក Lloyd Austin បាននិយាយនៅឯមន្ទីរបញ្ចកោណថា លោក បានអំពាវនាវឱ្យពួកគេដកកងទ័ពចេញពីប្រទេសរុស្ស៊ី ដោយគាំទ្រការអំពាវនាវធ្វើឡើងដោយសមភាគីកូរ៉េខាង្បូងរបស់លោក គឺលោក Kim Yong-hyun ។

លោក Austin និយាយថា សហរដ្ឋអាមេរិកនឹង បន្តធ្វើការជាមួយសម្ព័ន្ធមិត្ត និងដៃគូ ដើម្បីបង្អាក់រុស្ស៊ីពីការប្រើប្រាស់កងទ័ពទាំងនេះ ក្នុងការប្រយុទ្ធ។

ប៉ុន្តែ «វាអាចធ្វើទៅបាន» ដែលទីក្រុងមូស្គូនឹងនៅតែធ្វើដូច្នេះ នេះបើយោងតាមរដ្ឋមន្ត្រីការពារជាតិអាមេរិក ដែលបាននិយាយថា កងកម្លាំងកូរ៉េខាងជើង កំពុងត្រូវបានបំពាក់ដោយឯកសណ្ឋាន និងអាវុធ របស់រុស្ស៊ី។