ប្រធានាធិបតីប្រទេសបូលីវី កាលពីថ្ងៃពុធ (៣០ តុលា) បានអំពាវនាវឱ្យបញ្ចប់ការតវ៉ាបិទផ្លូវហាយវេ ដែលបានបង្កការរំខានដល់ផ្នែកជាច្រើននៃប្រទេស និងប៉ះពាល់ខ្លាំងដល់សេដ្ឋកិច្ច ថែមទាំងបង្កឱ្យមានជម្លោះកាន់តែខ្លាំងឡើងជាមួយនឹងគូប្រជែងនយោបាយដ៏សំខាន់។

លោកប្រធានាធិបតី លូអ៊ីស អារសេ (Luis Arce) បាននិយាយនៅក្នុងសារមួយទៅកាន់ប្រជាជាតិថា ការចំណាយលើសេដ្ឋកិច្ចនៃការតវ៉ាបិទផ្លូវក្នុងរយៈពេល ១៧ថ្ងៃនេះ សរុបជាង ១,៧ពាន់លានដុល្លារ ហើយមនុស្ស ៧០នាក់ រួមទាំងមន្រ្តីនគរបាល ៦១នាក់ ក៏បានរងរបួសនៅក្នុងបាតុកម្ម ដែលរៀបចំដោយអ្នកគាំទ្រអតីតប្រធានាធិបតី លោក អ៊ីវ៉ូ ម៉ូរែល (Evo Morales)។

លោក Arce បាននិយាយថា "យើងទាមទារឱ្យដកចំណុចបិទផ្លូវទាំងអស់ជាបន្ទាន់ដើម្បីភាពប្រក្រតីឡើងវិញនៅក្នុងប្រទេស" ដោយព្រមានថា រដ្ឋាភិបាលនឹងអនុវត្តវិធានការចាំបាច់ដើម្បីការពារប្រជាជនបូលីវី ប្រសិនបើក្រុមអ្នកតវ៉ាមិនធ្វើតាមសំណើនោះ។

ការលើកឡើងរបស់លោក Arce គឺជាកិច្ចប្រឹងប្រែងចុងក្រោយរបស់ខ្លួនដើម្បីទប់ស្កាត់ភាពតានតឹងដែលកំពុងកើនឡើងនៅក្នុងប្រទេស ដោយសារតែអ្នកគាំទ្ររបស់លោក Morales បានបិទផ្លូវហាយវេសំខាន់ៗ និងរារាំងការដឹកជញ្ជូនអាហារ និងប្រេងឥន្ធនៈ ក្នុងការតវ៉ាជុំវិញការវាយប្រហារដោយកាំភ្លើងមួយដែលត្រូវបានចោទលើរដ្ឋាភិបាលរបស់លោក Arce ប៉ុន្តែប្រធានាធិបតីរូបនេះបានបដិសេធ៕