មហាសន្និបាតអង្គការសហប្រជាជាតិ កាលពីថ្ងៃពុធ បានអំពាវនាវយ៉ាងលើសលប់ដល់សហរដ្ឋអាមេរិក ឱ្យបញ្ចប់របបទណ្ឌកម្មរយៈពេលជាច្រើនទសវត្សរ៍របស់ខ្លួនលើប្រទេសគុយបា ខណៈប្រទេសកោះតំបន់សមុទ្រការ៉ាអ៊ីបគ្រប់គ្រងដោយកុម្មុយនិស្តមួយនេះ ទទួលរងនូវវិបត្តិសេដ្ឋកិច្ចដ៏អាក្រក់បំផុតក្នុងរយៈពេលជាច្រើនទសវត្សរ៍មក ដែលបានបង្ហាញដោយការដួលរលំហេដ្ឋារចនាសម្ព័ន្ធ និងការខ្វះ ទំនិញជាមូលដ្ឋាន។

សេចក្តីសម្រេចគ្មានចំណងផ្លូវច្បាប់ ត្រូវបានអនុម័តដោយប្រទេសចំនួន១៨៧ប្រទេស ហើយមានតែសហរដ្ឋអាមេរិក និងអ៊ីស្រាអែលប៉ុណ្ណោះដែលប្រឆាំង ដោយប្រទេសម៉ុលដាវី អនុប្បវាទ។

ការបោះឆ្នោតនេះ បានធ្វើឡើងប៉ុន្មានថ្ងៃមុនការបោះឆ្នោតនៅសហរដ្ឋអាមេរិក ដោយបេក្ខជនប្រធានាធិបតីមកពីគណបក្សប្រជាធិបតេយ្យ លោកស្រី Kamala Harris និងគូប្រជែងមកពីគណបក្សសាធារណរដ្ឋ លោក Donald Trump បង្ហាញពីចំណាប់អារម្មណ៍តិចតួច ក្នុងការផ្លាស់ប្តូរគោលនយោបាយ។

រដ្ឋមន្ត្រីការបរទេសគុយបា លោក Bruno Rodriguez បាននិយាយនៅក្នុងសុន្ទរកថាមួយ នៅចំពោះមុខសភាថា អ្វីដែលគេតែងតែនិយាយយោងទៅរកថា បម្រាមពាណិជ្ជកម្មរបស់សហរដ្ឋអាមេរិក គឺជា «ការរារាំង» ដោយសារតែបណ្តាញច្បាប់និងបទប្បញ្ញត្តិ ធ្វើឱ្យស្មុគស្មាញដល់ប្រតិបត្តិការហិរញ្ញវត្ថុ និងការទទួលបានទំនិញ និងសេវាកម្ម មិនត្រឹមតែមកពីសហរដ្ឋអាមេរិកប៉ុណ្ណោះទេ ប៉ុន្តែជាអន្តរជាតិ។

លោក Rodriguez បាននិយាយថា «ការបិទផ្លូវប្រឆាំងប្រទេសគុយបា គឺជាសង្រ្គាមសេដ្ឋកិច្ច ហិរញ្ញវត្ថុ និងពាណិជ្ជកម្ម ដែលមានលក្ខណៈជាអំពើប្រល័យពូជសាសន៍» ដោយចោទប្រកាន់នយោបាយរបស់សហរដ្ឋអាមេរិកថា មានបំណងធ្វើឲ្យប្រជាជនគុយបា ជួបការលំបាកក្នុងចំណោមប្រជាជនជាច្រើន ដើម្បីបង្ខំឱ្យមានការផ្លាស់ប្តូរនៅក្នុងរដ្ឋាភិបាល។