ជម្លោះកប់កាន់តែជ្រៅរបស់ប្រទេសកាណាដាជាមួយឥណ្ឌាជុំវិញយុទ្ធនាការចោទប្រកាន់របស់ខ្លួនពាក់ព័ន្ធអំពើហិង្សាប្រឆាំងអ្នកកាន់សាសនាស៊ីក(Sikhs)ក្នុងប្រទេសកាណាដា អាចបង្កើនការគំរាមកំហែងផ្នែកចារកម្មតាមប្រព័ន្ធបច្ចេកវិទ្យាដែលមានមូលដ្ឋាននៅឥណ្ឌា និងរារាំងការធ្វើអន្តោប្រវេសន៍ ប៉ុន្តែក្រុមអ្នកវិភាគ និងអ្នកជំនាញមើលឃើញថាពុំមានផលប៉ះពាល់ភ្លាមៗលើពាណិជ្ជកម្មនោះទេ។  

ការព្រួយបារម្ភអំពីការបែកបាក់កាន់តែខ្លាំងរវាងប្រទេសទាំងពីរកើតឡើង បន្ទាប់ពីមន្ត្រីជាន់ខ្ពស់   កាណាដាមួយរូប បានប្រាប់គណៈកម្មាធិការសន្តិសុខជាតិរបស់សភាកាលពីថ្ងៃអង្គារថារដ្ឋមន្ត្រីក្រសួងមហាផ្ទៃឥណ្ឌាលោក អាមីតសា (Amit Shah) ជាសម្ព័ន្ធមិត្តជិតស្និទ្ធរបស់លោកនាយករដ្ឋមន្ត្រី Narendra Modi គឺជាមេក្លោងនៅពីក្រោយការចោទប្រកាន់នេះ។ 

ស្របពេលក្រុមមន្ត្រីឥណ្ឌា បានច្រានចោលសេចក្តីថ្លែងការណ៍របស់មន្ត្រីរូបនោះ គំហើញនេះអាចនឹងរុញឲ្យជម្លោះកាន់តែធ្ងន់ធ្ងរ ដែលបានចាប់ផ្តើមកាលពីមួយឆ្នាំមុន នៅពេលលោកនាយករដ្ឋមន្រ្តី Justin Trudeau បានលើកឡើងពីភស្តុតាងអាចជឿជាក់បាន ដែលភ្ជាប់ភ្នាក់ងារឥណ្ឌាទៅនឹងការបាញ់សម្លាប់មេដឹកនាំសាសនាស៊ីក កាលពីខែមិថុនា ឆ្នាំ២០២៣ លើលោក Hardeep Singh Nijjar នៅ ខេត្ត ប្រ៊ីធីសកូឡុំប៊ី (British Columbia) ។

ជាការឆ្លើយតប កាណាដា បានបណ្តេញអ្នកការទូតឥណ្ឌាចំនួន៦រូបកាលពីដើមខែនេះ ដោយចោទប្រកាន់ពួកគេពីបទមានជាប់ពាក់ព័ន្ធ ហើយមានបុរសបួននាក់ត្រូវបានចោទប្រកាន់ពីបទឃាតកម្ម។

ទីភ្នាក់ងារចារកម្មកាណាដាផ្តល់សញ្ញាថា ក្រុមអ្នកឃ្លាំមើលការគំរាមកំហែងតាមប្រព័ន្ធបច្ចេកវិទ្យាដែលមានមូលដ្ឋាននៅបរទេសបាននិយាយថា ទីក្រុងញូវដែលី ទំនងជាកំពុងធ្វើសកម្មភាពគំរាមកំហែងតាមអ៊ីនធឺណិតប្រឆាំងនឹងបណ្តាញកាណាដាសម្រាប់គោលបំណងចារកម្ម៕