មេដឹកនាំក្រុមហេសបូឡា លោក ណាអ៊ីម កាស្សេម(Naim Qassem) នៅក្នុងសុន្ទរកថាដំបូងរបស់លោក ចាប់តាំងពីត្រូវបានជ្រើសរើសជាមដឹកនាំកាលពីថ្ងៃទី២៩ ខែតុលា បាននិយាយថា ក្រុមប្រដាប់អាវុធនៅលីបង់ នឹងបន្តនៅលើផ្លូវនៃសង្រ្គាមជាមួយអ៊ីស្រាអែល។

លោកបាននិយាយថា យើងនឹងបន្តផែនការសង្រ្គាមរបស់យើងនៅក្នុងក្របខ័ណ្ឌនយោបាយដែលបានគ្រោងទុក ហើយយើងនឹងនៅតែស្ថិតលើផ្លូវនៃសង្រ្គាម ហើយលោកមានផែនការធ្វើតាមរបៀប ដែលបានកំណត់ដោយអ្នកបន្តតំណែងមុនរបស់លោក គឺ លោក Hassan Nasrallah ដែលត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលនៅក្នុងរដ្ឋធានីប្រទេសលីបង់ កាលពីខែកញ្ញា។

លោក Qassem និយាយថា ផែនការរបស់យើង គឺការការពារប្រទេសលីបង់។ ផែនការរបស់យើងគឺរំដោះទឹកដីរបស់យើង។ ផែនការរបស់យើងគឺគាំទ្របងប្អូនរបស់យើងនៅក្នុងដែនដីប៉ាឡេស្ទីន។

លោក Qassem គឺជាមន្ត្រីជាន់ខ្ពស់នៅក្នុងក្រុមហេសបូឡា រយៈពេលជាង៣០ឆ្នាំមកហើយ។ លោកត្រូវបានតែងតាំងជាអនុប្រធាននៅឆ្នាំ១៩៩១ ដោយអគ្គលេខាធិការក្រុមប្រដាប់អាវុធ លោក Abbas al-Musawi ដែលត្រូវបានសម្លាប់ដោយការវាយប្រហារដោយឧទ្ធម្ភាគចក្រអ៊ីស្រាអែល។

អ៊ីស្រាអែល បានបង្កើនការវាយប្រហារតាមដែនអាកាស នៅទូទាំងប្រទេសលីបង់ចាប់តាំងពីខែមុន ដោយនិយាយថាខ្លួនកំពុងផ្តោតលើក្រុមប្រដាប់អាវុធហេបូឡាលីបង់។

ក្រសួងសុខាភិបាលលីបង់ បាននិយាយកាលពីថ្ងៃពុធថា ការវាយប្រហាររបស់អ៊ីស្រាអែល នៅក្នុងប្រទេសលីបង់ បានសម្លាប់មនុស្ស ២.៨២២នាក់ និង១២.៩៣៧នាក់ផ្សេងទៀត បានរងរបួស ចាប់តាំងពីខែតុលា ឆ្នាំ២០២៣។