ទូរទស្សន៍ Kan TV News គ្រប់គ្រងដោយរដ្ឋរបស់អ៊ីស្រាអែល កាលពីថ្ងៃពុធ បានបង្ហាញឯកសារដែលអះអាងថា ជាសេចក្តីព្រាងកិច្ចព្រមព្រៀងរវាងអ៊ីស្រាអែល និងលីបង់ ដែលស្នើឡើងដោយសហរដ្ឋអាមេរិក ដើម្បីបញ្ចប់ការប៉ះទង្គិចគ្នារវាងអ៊ីស្រាអែល និងក្រុមហេសបូឡា នាពេលបច្ចុប្បន្ននេះ។

ដោយដកស្រង់សម្តីពីមន្ត្រីជាន់ខ្ពស់អ៊ីស្រាអែល ប៉ុស្តិ៍ទូរទស្សន៍បានរាយការណ៍ថា គណៈរដ្ឋមន្ត្រីសង្គ្រាម ពេញចិត្តនឹងសេចក្តីព្រាងនេះ ដែលត្រូវបានបង្កើតឡើងដោយបេសកជនអាមេរិក លោក Amos Hochstein និងបានផ្ញើទៅឲ្យអ៊ីស្រាអែល ហើយឱកាសនៃការទទួលយកមានកម្រិតខ្ពស់។

យោងតាមសេចក្តីព្រាងនេះ អ៊ីស្រាអែល នឹងត្រូវដកកងកម្លាំងរបស់ខ្លួនចេញពីប្រទេសលីបង់ភាគខាងត្បូងក្នុងរង្វង់ពេលប្រាំពីរថ្ងៃបន្ទាប់ពីការចុះហត្ថលេខាលើកិច្ចព្រមព្រៀង ដែលនឹងត្រូវបានពិនិត្យដោយសហរដ្ឋអាមេរិក និងប្រទេសមួយផ្សេងទៀត។

ក្នុងរង្វង់ពេល៦០ថ្ងៃ ប្រទេសលីបង់ នឹងត្រូវរំសាយក្រុមយោធាមិនផ្លូវការណាមួយ នៅភាគខាងត្បូងប្រទេសលីបង់ ហើយតាមដានការលក់និងផលិតអាវុធនៅលើទឹកដីរបស់ខ្លួន ដូច្នេះ អាវុធពុំអាចទៅដល់ដៃក្រុមហេសបូឡា ឬក្រុមប្រដាប់អាវុធដទៃទៀតឡើយ។

សេចក្តីព្រាងនិយាយថា កងទ័ពលីបង់ និងកងកម្លាំងបណ្តោះអាសន្នរបស់អង្គការសហប្រជាជាតិ នៅក្នុងប្រទេសលីបង់ (UNIFIL) នឹងក្លាយជាកងកម្លាំងប្រដាប់អាវុធតែមួយគត់នៅភាគខាងត្បូងប្រទេសលីបង់។

សហរដ្ឋអាមេរិក រួមជាមួយនឹងស្ថាប័នអន្តរជាតិ និងប្រទេសជាច្រើនទៀត នឹងត្រូវព្រមព្រៀងគ្នា ដែលនឹងពិនិត្យមើលការអនុវត្តកិច្ចព្រមព្រៀងនេះ ជាមួយនឹងលទ្ធភាពនៃការដាក់ទណ្ឌកម្មសេដ្ឋកិច្ច និងផ្នែកការទូត ដើម្បីធានាបានការអនុវត្តន៍។

ទន្ទឹមនឹងនេះ នាយករដ្ឋមន្ត្រីលីបង់ លោក Najib Mikati បាននិយាយថា លោកសង្ឃឹមថា នឹងបានមើលឃើញបទឈប់បាញ់ជាមួយអ៊ីស្រាអែល នៅប៉ុន្មានថ្ងៃខាងមុខនេះ។