សមាគមវេជ្ជសាស្ត្រ បាននិយាយកាលពីថ្ងៃពុធ (៣០ តុលា) ថា យ៉ាងហោចណាស់មនុស្ស ១០នាក់ ត្រូវបានបាញ់សម្លាប់ និង ៦៣នាក់ផ្សេងទៀតបានរងរបួស ដោយការបាញ់កាំភ្លើងក្នុងអំឡុងពេលការតវ៉ាក្រោយការបោះឆ្នោត នៅក្នុងប្រទេសម៉ូហ្ស៊ំប៊ិក កាលពីសប្តាហ៍មុន ខណៈប្រទេសនេះត្រៀមទប់ទល់បាតុកម្មបន្ថែមទៀត។

ការតវ៉ាបានផ្ទុះឡើងមុន និងក្រោយគណៈកម្មាធិការរៀបចំការបោះឆ្នោតម៉ូហ្ស៊ំប៊ិក បានប្រកាសថា គណបក្សកាន់អំណាច ហ្រ្វេលីម៉ូ (Frelimo) បានឈ្នះការបោះឆ្នោតកាលពីថ្ងៃទី០៩ ខែតុលា ដោយបន្តកាន់អំណាចរយៈពេល ៤៩ឆ្នាំ។ ភាពតានតឹងបានកើនឡើងកាន់តែខ្លាំង បន្ទាប់ពីមេធាវីម្នាក់ និងមន្ត្រីបក្សប្រឆាំងម្នាក់ ត្រូវបាញ់សម្លាប់នៅក្នុងរថយន្តរបស់ពួកគេ ៣ថ្ងៃបន្ទាប់ពីការបោះឆ្នោត។

នគរបាលបានឆ្លើយតបនឹងការតវ៉ាដោយប្រើឧស្ម័នបង្ហូរទឹកភ្នែក និងការបាញ់កាំភ្លើង។ រដ្ឋមន្ត្រីក្រសួងមហាផ្ទៃ លោក ប៉ាស្គូល រ៉ុនដា (Pascoal Ronda) បានប្រាប់អ្នកយកព័ត៌មានកាលពីថ្ងៃអង្គារថា ការតវ៉ាមានភាពហិង្សា ហើយកងសន្តិសុខត្រូវបង្ខំចិត្តប្រើកម្លាំងឱ្យស្តារសណ្តាប់ធ្នាប់សាធារណៈឡើងវិញ ដែលបណ្តាលឱ្យមានអ្នកស្លាប់។

អង្គការឃ្លាំមើលសិទ្ធិមនុស្ស ដែលបានបញ្ជាក់ដោយឯករាជ្យថាមានមនុស្សស្លាប់ចំនួន ១១នាក់ និងច្រើនជាង ៥០នាក់ បានរងរបួសដោយគ្រាប់កាំភ្លើងយ៉ាងធ្ងន់ធ្ងរ បាននិយាយថា តួលេខអ្នកស្លាប់ពិតប្រាកដអាចខ្ពស់ជាងនេះ ដោយសារមនុស្សជាច្រើនមិនបានរាយការណ៍ទៅមន្ទីរពេទ្យ៕