កំពង់ឆ្នាំង ៖ ឆ្នាំនេះរដ្ឋបាលខេត្តកំពង់ឆ្នាំងគ្រោងនឹងបញ្ជូនទូកអុំ ទូកចែវ ចំនួន២៦ទូក ទៅចូលរួមប្រណាំងក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅរាជធានីភ្នំពេញ ដែលនឹងប្រព្រឹតទៅអំឡុងខែវិច្ឆិកានាខាងមុខនេះ ។ នេះបើយោងតាមការបញ្ជាក់របស់ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង នាព្រឹកថ្ងៃទី៣១ ខែតុលា ឆ្នាំ២០២៤នេះ ។ 

ឯកឧត្តម ស៊ុន សុវណ្ណារិទ្ធិ បានបន្តថា៖ ឆ្នាំនេះខេត្តកំពង់ឆ្នាំង បានបញ្ជូនទូកអុំ ទូកចែវចំនួន២៦ទូក ក្នុងនោះមានទូកអុំ ទូកចែវ ក្នុងនោះទូកចែវបុរសមាន១៥ទូក ទូកចែវនារីមាន១ទូក ទូកអុំបុរសខ្នាតវែងមានចំនួន១ និងទូកអុំបុរសខ្នាតអន្តរជាតិមានចំនួន៨ទូក និងមានកីឡាករ កីឡាការនីសរុបចំនួន១៥១៦នាក់ អោយទៅចូលរួម អុំនិងចែវប្រណាំងនៅរាជធានីភ្នំពេញ ដែលទូកទាំងនោះមកពីក្រុងស្រុកចំនួន៦។ ខេត្តកំពង់ឆ្នាំង បានត្រៀមបញ្ជូនទូកចែវ ទូកអុំ ទៅប្រណាំងក្នុងព្រះរាជពិធីបុណ្យអុំទូក ចាប់តាំងពីឆ្នាំ១៩៩១មកម្ល៉េះ ក្នុងពេលរាជរដ្ឋាភិបាលកម្ពុជា បានរៀបចំព្រះរាជពិធីបុណ្យ អុំទូក បណ្តែតប្រទីប ជាលើកដំបូង ។ រាល់ពេលប្រកួត កីឡាករកីឡាការិនីខេត្តកំពង់ឆ្នាំង តែងតែនាំមកវិញនូវពានរង្វាន់ជ័យលាភីជូនខេត្តជាច្រើនផងដែរ ។ ចំពោះកីឡាករ កីឡាការនីទូកទាំងអស់ បានចាប់ផ្តើមទម្លាក់ទូកចូលទន្លេរួចទាំង២៦ទូកហើយ និងកំពុងហ្វឹកហាត់ការចែវ និងអុំអោយបានស្ទាត់ជំនាញ ដោយឡែកចាស់ព្រឹទ្ធាចារ្យតាមវត្តមួយៗដែលមានទូក ងវិញ កំពុងប្រាប់ និងបង្រៀនពីវិធីសាស្ត្រនៃការអុំ ឬចែវ ដើម្បីទទួលជោគជ័យផងដែរ។

ពិធីបុណ្យអុំទូក បណ្តែតប្រទីប អកអំបុក និងសំពះព្រះខែ តែងត្រូវបានរៀបចំឡើងជារៀងរាល់ឆ្នាំ ហើយការប្រណាំងទូកមានរយះពេល៣ថ្ងៃ និងពេលយប់ ក៏ មានការ បណ្តែតប្រទីប ផងដែរ ។ ការប្រារព្ធពិធីបុណ្យនេះឡើង ដើម្បីរម្លឹកដល់គំរូវីរភាពដ៏អង់អាចក្លាហានរបស់កងទ័ពជើងទឹកខ្មែរយើង ដែលបានរំដោះទឹកដីពីខ្មាំងសត្រូវ ។ ពិធីបុណ្យ អុំទូកនេះ ក៏បានភ្ជាប់ទៅនឹងពិធីផ្សេងៗទៀតផងដែរ គឺការបណ្ដែតប្រទីប អកអំបុក និងសំពះព្រះខែ ដែលជាការឆ្លុះបញ្ចាំងពីជំនឿសាសនាយ៉ាងមុតមាំរបស់ប្រជាពលរដ្ឋ ។

ឯកឧត្តមអភិបាលខេត្ត បានផ្តាំផ្ញើដល់កីឡាករកីឡាការនីទាំងអស់ ត្រូវខិតខំយកអស់ពីកម្លាំងកាយកម្លាំងចិត្តអនុវត្តឲ្យបានម៉ឺងម៉ាត់ តាមបទបញ្ជារបស់គណៈកម្មការបច្ចេកទេស ដោយរក្សាបាននូវសីលធម៌ គុណធម៌ សុជីវធម៌ ឲ្យសក្តិសមជាកីឡាករ កីឡាការនី និងត្រូវរក្សាទំនាក់ទំនងល្អ សាមគ្គីភាពគ្នា និងត្រូវចេះថែទាំសុខភាព ផងដែរ៕ កាំង ហុងវាស្នា