បេសកកម្មរក្សាសន្តិភាពរបស់អង្គការសហប្រជាជាតិ នៅក្នុងប្រទេសលីបង់ បានកត់ត្រាឧប្បត្តិហេតុជាង ៣០ លើក ក្នុងខែនេះ ដែលបណ្តាលឲ្យខូចខាតទ្រព្យសម្បត្តិ ឬរបួសដល់កងកម្លាំងរក្សាសន្តិភាពប្រហែល ២០នាក់ មកពីការបាញ់ប្រហារ ឬសកម្មភាពរបស់អ៊ីស្រាអែល។

កងកម្លាំងរក្សាសន្តិភាពរបស់UN ត្រូវបានដាក់ពង្រាយ នៅក្នុងប្រទេសលីបង់ ចាប់តាំងពីការឈ្លានពានរបស់ប្រទេសអ៊ីស្រាអែល ក្នុងឆ្នាំ ១៩៧៨ ។ កាលពីពេលថ្មីៗនេះ កងកម្លាំងនេះ ត្រូវបានរុញច្រានចូលទៅក្នុងជួរមុខនៃសង្រ្គាមថ្មីរវាងអ៊ីស្រាអែល និងក្រុមហេសបូឡា ដោយអ៊ីស្រាអែល បានអំពាវនាវម្តងហើយម្តងទៀត ឲ្យកងរក្សាសន្តិភាពបោះបង់ចោលទីតាំងឈរជើងរបស់ពួកគេ។

លោក Andrea Tenenti អ្នកនាំពាក្យរបស់កងកម្លាំងរក្សាសន្តដែលត្រូវបានគេស្គាល់ថា UNIFIL បានប្រាប់សន្និសីទសារព័ត៌មានដែលធ្វើឡើងតាមវីដេអូថា ក្នុងចំណោមឧប្បត្តិហេតុទាំង ៣០លើក ក្នុងខែនេះ ប្រហែល ២០លើក ដែលយើងអាចសន្មតថា ជាការបាញ់ ឬសកម្មភាពរបស់កងកម្លាំងការពារអ៊ីស្រាអែល (IDF) ដោយ ៧លើក គឺជាចេតនាយ៉ាងច្បាស់»។

លោក Tenenti បាននិយាយថា៖«អ្វីដែលមានការព្រួយបារម្ភខ្លាំងនោះ គឺឧបទ្ទវហេតុដែលកងរក្សាសន្តិភាពបំពេញការងារត្រួតពិនិត្យរបស់ពួកគេ ក៏ដូចជាកាមេរ៉ា ភ្លើង និងប៉មយាមរបស់យើងទាំងអស់ ត្រូវបាន IDF កំណត់គោលដៅដោយចេតនា»។

លោកបាននិយាយថា កាលពីថ្ងៃចន្ទ គ្រាប់រ៉ូកែតមួយគ្រាប់ ដែលប្រហែលជាត្រូវបានបាញ់ដោយក្រុមហេសបូឡា ឬក្រុមពាក់ព័ន្ធមួយ បានវាយប្រហារទីស្នាក់ការកណ្តាលនៃបេសកកម្មរបស់អង្គការសហប្រជាជាតិនៅទីក្រុង Naqoura ប្រទេសលីបង់។