ក្រុមប្រឹក្សាសន្តិសុខអង្គការសហប្រជាជាតិ បានចេញសេចក្តីថ្លែងការណ៍មួយកាលពីថ្ងៃពុធ ដោយថ្កោលទោសយ៉ាងខ្លាំងចំពោះការវាយប្រហារភេរវកម្មកាលពីថ្ងៃសៅរ៍ ទៅលើកងកម្លាំងអនុវត្តច្បាប់ នៅភាគអា គ្នេយ៍ប្រទេសអ៊ីរ៉ង់។

យ៉ាងហោចណាស់បុគ្គលិកអនុវត្តច្បាអ៊ីរ៉ង់ ១០នាក់ ត្រូវបានសម្លាប់ នៅក្នុងការវាយប្រហារដ៏សាហាវ នៅក្នុងទីក្រុង Taftan ខេត្ត Sistan និង Baluchestan ។ ក្រុម Jaish al-Adl បានអះអាងទទួលខុសត្រូវចំពោះការវាយប្រហារនេះ។ នេះបើយោងតាមការបញ្ជាក់ពីនគរបាលអ៊ីរ៉ង់។

សេចក្តីថ្លែងការណ៍ បាននិយាយថា សមាជិកក្រុមប្រឹក្សានេះ បានសម្តែងការអាណិតអាសូរ និងរំលែកទុក្ខយ៉ាងក្រៀមក្រំបំផុតចំពោះក្រុមគ្រួសារនៃជនរងគ្រោះ និងប្រជាជន និងរដ្ឋាភិបាលនៃប្រទេសអ៊ីរ៉ង់។

ពួកគេបានបញ្ជាក់សាជាថ្មីថា អំពើភេរវកម្មក្នុងគ្រប់ទម្រង់ និងអ្វីដែលកើតឡើងទាំងអស់ គឺជាការគំរាមកំហែងដ៏ធ្ងន់ធ្ងរបំផុតមួយចំពោះសន្តិភាព និងសន្តិសុខអន្តរជាតិ ដោយគូសបញ្ជាក់អំពីតម្រូវការឲ្យខ្លួនជនល្មើស អ្នករៀបចំ អ្នកផ្តល់ហិរញ្ញប្បទាន និងអ្នកឧបត្ថម្ភដល់អំពើភេរវកម្មដ៏អាក្រក់ទាំងនេះ ទទួលខុសត្រូវ និងនាំពួកគេ ឡើងតុលាការ។

អនុលោមតាមកាតព្វកិច្ចរបស់ពួកគេក្រោមច្បាប់អន្តរជាតិ និងសេចក្តីសម្រេចរបស់ក្រុមប្រឹក្សាសន្តិសុខដែលពាក់ព័ន្ធ សមាជិកក្រុមប្រឹក្សានេះ បានជំរុញឲ្យរដ្ឋទាំងអស់ សហការយ៉ាងសកម្មជាមួយរដ្ឋាភិបាលអ៊ីរ៉ង់ ក៏ដូចជាអាជ្ញាធរពាក់ព័ន្ធទាំងអស់ ក្នុងរឿងនេះ។