ឯកឧត្តមវ៉ាងវិនពិន( Wang Wenbin) ឯកអគ្គរដ្ឋ ទូតចិនប្រចាំកម្ពុជា បានបន្តអះអាងថា តាងនាមជាមិត្តដែកថែប និងជាបងប្អូន ប្រទេសចិន ប្រកាស​បន្តគាំទ្រ​ដល់​កិច្ចខិតខំ​ប្រឹងប្រែង​របស់​កម្ពុជាលើការងារបោសសម្អាតមីន រហូតដល់កម្ពុជាប្រកាសអស់មីន។

ឯកឧត្តម Wang Wenbin ឯកអគ្គរដ្ឋទូតសា​ធារណរដ្ឋ​ប្រជាមានិត​ចិន​ប្រចាំ​នៅ​កម្ពុជា​បាន​ប្រកាស​បែប​នេះនាថ្ងៃទី៣១ ខែតុលា ឆ្នាំ២០២៤នេះ នៅទីស្នាក់ការអាជ្ញាធរមីន ក្នុងខណៈ ឯកឧត្តម​បណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន បានអនុញ្ញាតឱ្យ ចូល​ជួប​ពិភាក្សាការងារដើម្បីពង្រឹងភាពជាដៃគូ និងកិច្ចសហប្រតិបត្តិការសកម្មភាពមីននៅកម្ពុជា។

ឯកឧត្តមឯកអគ្គរដ្ឋទូតចិនប្រចាំកម្ពុជា ក៏បានវាយតម្លៃខ្ពស់ចំពោះទំនាក់ទំនងជាប្រវត្តិសាស្រ្ត និង​មិត្តភាពរវាងប្រទេស និងប្រជាជនទាំងពីរកម្ពុជា-កម្ពុជា ដោយឯកឧត្តមបានបន្តអះអាងថា តាង​នាមជាមិត្តដែកថែប និងជាបងប្អូន ដូច្នេះប្រទេសចិន សូមប្រកាស​បន្តគាំទ្រ​ដល់កិច្ចខិតខំ​ប្រឹង​ប្រែង​របស់កម្ពុជាលើការងារបោសសម្អាតមីន រហូតដល់កម្ពុជាប្រកាសអស់មីន។

ក្នុងជំនួបនោះ ឯកឧត្តមទេសរដ្ឋមន្រ្តី លី ធុជ បានលើកឡើងអំពីទំនាក់ទំនងជាប្រវត្តិសាស្រ្ត និង​ប្រពៃណី​រវាងប្រទេស និងប្រជាជននៃកម្ពុជា-ចិន ព្រមទាំងបានថ្លែងអំណរគុណ និងវាយតម្លៃ​ខ្ពស់​ចំពោះ​ការរួមចំណែករបស់ប្រទេសចិន ក្នុងដំណើរស្វែងរកសន្តិភាព និងការអភិវឌ្ឍនៅកម្ពុជា ក្នុង​នោះរួមទាំងការគាំទ្រដល់ការងារបោសសម្អាតមីន និង​សំណល់​ជាតិ​ផ្ទុះ​ពី​សង្រ្គាម​នៅ​កម្ពុជា។​  ឯកឧត្តម លី ធុជ បានចាត់ទុកប្រទេសចិន គឺជាដៃគូមួយ​យ៉ាងសំ​ខាន់​ក្នុងកា​រ​រួម​ចំណែក​ផ្តល់​ដី​ប្រកប​ដោយសុ​វតិ្ថភាព ការធ្វើឱ្យប្រសើរឡើង និងលើកកម្ពស់ជីវភាព​រស់នៅ​របស់​ប្រជា​ពលរដ្ឋ​នៅ​តាម​មូលដ្ឋាន តាមរយៈវិស័យសកម្មភាពមីន។

ជាមួយគ្នានោះ ឯកឧត្តមទេសរដ្ឋមន្រ្តី ក្នុងនាមកម្ពុជាជាប្រធានអនុសញ្ញាអូតាវ៉ា បានថ្លែង​អំណរ​គុណ​ដល់​រដ្ឋាភិបាលចិន ដែលបានផ្តល់ការគាំទ្រដល់ដំណើរការភាពជាប្រធាន និងម្ចាស់​​ផ្ទះ​រៀប​ចំ​កិច្ច​ប្រជុំកំពូល-អង្គរស្តីពីពិភពលោកមួយដែលគ្មានមីន នៃអនុសញ្ញាអូតាវ៉ា និងបានអញ្ជើញ ឯកឧត្តម Wang Wenbin ឯកអគ្គរដ្ឋទូតសាធារណរដ្ឋចិនប្រចាំនៅកម្ពុជា ចូលរួម​ក្នុង​ពិធី​បើក​កិច្ច​ប្រជុំ​កំពូលសៀមរាប-អង្គរ នាព្រឹកថ្ងៃទី២៥ ខែវិច្ឆិកា ឆ្នាំ២០២៤ ខាងមុខ ក្រោមអធិបតីរបស់ សម្តេច​មហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា៕ អត្ថបទ៖ ភារម្យ