ក្រុមមន្ត្រី បានប្រាប់សារព័ត៌មានរ៉យទ័រថា អាជ្ញាធរនៅក្នុងទីក្រុង Horlivka ប្រទេសអ៊ុយក្រែនភាគខាងកើតគ្រប់គ្រងដោយរុស្ស៊ី បានដំឡើងឧបករណ៍បង្អាក់សញ្ញានៅលើរថយន្តក្រុងក្នុងស្រុកមួយចំនួន ដើម្បីការពារពួកគេពីការវាយប្រហារដោយយានដ្រូន។ 

អាជ្ញាធរតែងតាំងដោយរុស្ស៊ី បាននិយាយថា យ៉ាងហោចណាស់រថយន្តក្រុងមួយគ្រឿង បើកបរនៅជុំវិញទីក្រុង មានទីតាំងនៅជិតទីក្រុង Donetsk គ្រប់គ្រងដោយរុស្ស៊ី ត្រូវបានវាយប្រហារដោយយានដ្រូនរបស់អ៊ុយក្រែននៅក្នុងខែនេះ បណ្តាលឲ្យមនុស្ស៣នាក់រងរបួស។

ឧបករណ៍បង្អាក់សញ្ញា ធ្វើការដោយធ្វើឲ្យរំខានដល់ទំនាក់ទំនងរបស់យានដ្រូនជាមួយប្រតិបត្តិកររបស់វា ធ្វើឱ្យវាបង្កគ្រោះថ្នាក់តិចតួច ទោះបីជាយានដ្រូនដែលធ្លាក់ បណ្តាលឱ្យមានការខូចខាតមួយចំនួនក៏ដោយ។

លោក Vladimir Mironov ម្ចាស់ និងជាអ្នកគ្រប់គ្រងឃ្លាំងរថយន្តក្រុង នៅទីក្រុង Horlivka បាននិយាយថា «យើងមិនអាចការពារអ្នកបើកបររថយន្តក្រុង និងអ្នកដំណើរដោយខ្លួនឯងបានទេ ដូច្នេះយើងបានស្នើសុំជំនួយ ហើយពួកគេបានផ្តល់ឱ្យយើងនូវឧបករណ៍បង្អាក់សញ្ញាចំនួនបួនគ្រឿង។

យើងមិនដឹងថា តើឧបករណ៍ទាំងនេះនឹងមានប្រសិទ្ធភាពប៉ុណ្ណានោះទេ ប៉ុន្តែវាជារឿងដែលយើងអាចធ្វើបានសម្រាប់ជាប្រយោជន៍ដល់សន្តិសុខ នៅពេលនេះ។ 

ទីក្រុង Horlivka មានទីតាំងនៅជិតសមរភូមិមុខ ហើយអាជ្ញាធរក្នុងតំបន់តែងតែរាយការណ៍ពីការបាញ់ផ្លោង និងការវាយប្រហារដោយយានដ្រូន។ ទីក្រុង Donetsk បានស្ថិតនៅក្រោមការគ្រប់គ្រងរបស់រុស្ស៊ីចាប់តាំងពីឆ្នាំ២០១៤ ប៉ុន្តែកងទ័ពអ៊ុយក្រែន នៅតែបន្តកាន់កាប់ទីតាំងមួយចំនួននៅជាយក្រុង ហើយទីក្រុងនេះតែងតែរងការបាញ់ផ្លោងដោយកាំភ្លើងធំ ជាញឹកញាប់។