ទូរទស្សន៍ Al Manar បានរាយការណ៍ដោយដកស្រង់សម្តីរបស់ក្រសួងសុខាភិបាលលីបង់ថា យន្តហោះចម្បាំងរបស់កងកម្លាំងទ័ពអាកាសអ៊ីស្រាអែល បានធ្វើការវាយប្រហារទ្រង់ទ្រាយធំ ទៅលើទីតាំងជាច្រើនរបស់ក្រុមហេសបូឡាហ៍ នៅជ្រលងភ្នំ Beqaa ភាគខាងកើតប្រទេសលីបង់ កាលពីថ្ងៃពុធ ដោយបានសម្លាប់មនុស្សយ៉ាងហោចណាស់ ៣៤នាក់។

ការវាយប្រហារផ្លូវអាកាសដ៏សាហាវបំផុត បានកើតឡើង នៅក្នុងទីប្រជុំជន Sohmor ដែលជនស៊ីវិលយ៉ាងតិច ១៥នាក់ ត្រូវបានសម្លាប់។ មនុស្ស ១០នាក់ផ្សេងទៀត បានស្លាប់នៅក្នុងកសិដ្ឋាន Salilbi ខណៈដែល ៦នាក់ បានរងរបួស។ ក្រៅពីនេះ អ្នកស្រុកចំនួន ៩នាក់ បានស្លាប់ និង២នាក់ រងរបួស នៅក្នុងទីក្រុង Bednayel។

កាលពីព្រឹកថ្ងៃពុធ ការជម្លៀសត្រូវបានបញ្ជាពីស្រុកមួយចំនួនក្នុងទីរួមខេត្ត Baalbek ចម្ងាយប្រហែល ៩៥ គីឡូម៉ែត្រពីរដ្ឋធានីបេរូត បន្ទាប់ពីមានការព្រមានពីអ្នកនាំពាក្យកងទ័ពអ៊ីស្រាអែល។

ក្រោយមក ការវាយប្រហារចំនួន ៦លើក ត្រូវបានធ្វើឡើងទៅលើទីក្រុងនេះ ជាកន្លែងបេតិកភណ្ឌពិភពលោករបស់អង្គការយូណេស្កូ គឺប្រាសាទ Baalbek បានតាំងនៅ តាំងពីសម័យរ៉ូម៉ាំងមកម្ល៉េះ។

រដ្ឋមន្ត្រីក្រសួងវប្បធម៌ចាំផ្ទះរបស់សាធារណរដ្ឋនេះ លោក Mohammad Mortada បានថ្កោលទោសការវាយឆ្មក់តាមអាកាសលើជ្រលងភ្នំ Baalbek ក្នុងនាមរដ្ឋាភិបាលលីបង់។ លោកបាននិយាយថា៖«អ៊ីស្រា  អែល ត្រូវតែត្រូវបាននបញ្ឈប់ពីការបំផ្លាញទីតាំងសម័យបុរាណដែលជាបេតិកភណ្ឌពិភពលោក នៅក្នុងប្រទេសលីបង់។