រដ្ឋមន្ត្រីការបរទេសចិន លោក Wang Yi កាលពីថ្ងៃពុធ (ទី៣០ ខែតុលា) បាននិយាយថា ប្រទេសចិនសង្ឃឹមថា ប្រទេសហ្វាំងឡង់អាចដើរតួនាទីស្ថាបនា ក្នុងការជំរុញឲ្យសហភាពអឺរ៉ុប (EU) ជៀសវាងការធ្វើនយោបាយបញ្ហាសេដ្ឋកិច្ច និងពាណិជ្ជកម្ម ដោះស្រាយការខ្វែងគំនិតគ្នាឲ្យបានត្រឹមត្រូវតាមរយៈការសន្ទនា និងការពិគ្រោះយោបល់ ហើយនិងរួមគ្នាការពារស្ថានភាពរួមនៃទំនាក់ទំនងរបស់ប្រទេសចិន និងសហភាពអឺរ៉ុប។

លោក Wang ដែលជាសមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនីស្តចិន (CPC) ដែរនោះ បានធ្វើការកត់សម្គាល់បែបនេះ ក្នុងអំឡុងពេលពិភាក្សារបស់លោកជាមួយរដ្ឋមន្ត្រីការបរទេសហ្វាំងឡង់ លោកស្រី Elina Valtonen។

លោក Wang បានបន្ថែមថា ដំណើរទស្សនកិច្ចផ្លូវរដ្ឋរបស់ប្រធានាធិបតីហ្វាំងឡង់ លោក Alexander Stubb មកកាន់ប្រទេសចិន អមដោយគណៈប្រតិភូជាន់ខ្ពស់ មិនត្រឹមតែជាការបន្តមិត្តភាពប៉ុណ្ណោះទេ ប៉ុន្តែក៏ជាឱកាសដើម្បីពង្រីកបន្ថែមកិច្ចសហប្រតិបត្តិការផងដែរ។

លោក Wang បានសង្កត់ធ្ងន់ថា EU ដែលបានដំឡើងពន្ធលើយានយន្តអគ្គិសនីរបស់ចិន ជាក់ស្តែងបានរំលោភលើច្បាប់របស់អង្គការពាណិជ្ជកម្មពិភពលោក (WTO) និងគោលការណ៍នៃពាណិជ្ជកម្មសេរី ដោយលោកបានបន្ថែមថា ប្រទេសចិនតែងតែជឿថា សកលភាវូបនីយកម្មសេដ្ឋកិច្ចបរិយាបន្នជាសកល គឺជាផលប្រយោជន៍របស់ភាគីពាក់ព័ន្ធទាំងអស់។

ចំណែកលោកស្រីលោក Valtonen បាននិយាយថា ក្នុងនាមជាសមាជិកនៃសហភាពអឺរ៉ុប ប្រទេសហ្វាំងឡង់សង្ឃឹមថា ទំនាក់ទំនង EU-ចិន នឹងរក្សាបាននូវការអភិវឌ្ឍប្រកបដោយការស្ថាបនា និងគាំទ្រភាគីទាំង២ ក្នុងការពង្រឹងកិច្ចសហប្រតិបត្តិការ និងដោះស្រាយការខ្វែងគំនិតឲ្យបានត្រឹមត្រូវ៕