ទូរទស្សន៍ Al Mayadeen បានរាយការណ៍ថា មូលដ្ឋានយោធាអាមេរិក នៅជិតតំបន់ប្រេង Al Omar ក្នុងខេត្ត Deir ez-Zor ភាគខាងកើតប្រទេសស៊ីរី បានរងការវាយប្រហារដោយគ្រាប់ផ្លោង។

ព័ត៌មានលម្អិតនៃឧបទ្ទវហេតុនេះ មិនទាន់ដឹងនៅឡើយទេ។

មុននេះ វិទ្យុ Sham FM របស់ស៊ីរី បានជូនដំណឹងថា ការផ្ទុះមួយ ត្រូវបានគេឮ នៅក្នុងបរិវេណនោះ។

ផ្នែកធំៗនៃខេត្តស៊ីរី Al-Hassakah, Deir ez-Zor និង Raqqa ដែលមានទីតាំងនៅភាគខាងកើត និងភាគឦសានរបស់ប្រទេសនេះ ឥឡូវនេះត្រូវបានគ្រប់គ្រងដោយកងកម្លាំងប្រជាធិបតេយ្យស៊ីរី (SDF) ដែលជាក្រុមចម្រុះដឹកនាំដោយជនជាតិឃើដគាំទ្រដោយ

សហរដ្ឋអាមេរិក។ ចាប់តាំងពីឆ្នាំ ២០១៥ មក បញ្ជាការសហរដ្ឋអាមេរិក បានបង្កើតមូលដ្ឋានយោធាចំនួន ៩ នៅក្នុងតំបន់នេះ។ នៅចុងឆ្នាំ ២០១៩ លោក ដូណាល់ ត្រាំ (Donald Trump) ដែលជាប្រធានាធិបតីអាមេរិកនៅពេលនោះ បានអនុម័តផែនការមួយ ដែលក្រោមផែនការនេះ ទាហានអាមេរិករាប់រយនាក់ ត្រូវស្នាក់នៅក្នុងប្រទេសស៊ីរី ដើម្បីគ្រប់គ្រងអណ្តូងប្រេងនៅភាគឦសាន និងភាគខាងកើតនៃប្រទេសស៊ីរី។ ទីក្រុងដាម៉ាស ថ្កោលទោសវត្តមានយោធារបស់សហរដ្ឋអាមេរិក នៅក្នុងទឹកដីរបស់ខ្លួនថា ជាការកាន់កាប់ខុសច្បាប់។

បន្ទាប់ពីការកើនឡើងនៃជម្លោះប៉ាឡេស្ទីន និងអ៊ីស្រាអែលនៅតំបន់ហ្កាហ្សាស្ទ្រីប ក្នុងខែតុលា ឆ្នាំ ២០២៣ អង្គភាពស៊ីអ៊ីត បានបង្កើនការវាយប្រហារដោយមីស៊ីល និងយានដ្រូនលើមូលដ្ឋានយោធាអាមេរិក នៅអ៊ីរ៉ាក់ និងស៊ីរី ដោយទាមទារថា សហរដ្ឋអាមេរិក គួរតែឈប់ផ្តល់ជំនួយយោធាដល់អ៊ីស្រាអែល។