ស្របពេលដែលព្យុះទីហ្វុង Kong-rey បានវាយប្រហារកោះតៃវ៉ាន់ នៅថ្ងៃព្រហស្បតិ៍នេះ ទីក្រុងតំបន់ឆ្នេររបស់ចិន បានត្រៀមខ្លួនរួចជាស្រេច ពេលគេរំពឹងថា ព្យុះមួយនេះ នឹងបោកបក់ដល់ដីគោលនៅខេត្ត Fujian នាព្រឹកថ្ងៃសុក្រស្អែកនេះ ។

ទូរទស្សន៍រដ្ឋចិន CCTV រាយការណ៍ថា ទីក្រុងតំបន់ឆ្នេរនៅខេត្ត Fujian និងខេត្ត Zhejiang រលកនៅតាមមាត់សមុទ្រមានកម្ពស់រហូតដល់ ៥-៦ម៉ែត្ររួចទៅហើយ ។ ទូកនេសាទទាំងអស់ បានឡើងកំពង់ ហើយតំបន់ទេសចរណ៍ បានបិទ ។

ខេត្ត Zhejiang បានចេញការព្រមានពីព្យុះទីហ្វុង ហើយនិងបានផ្អាកសេវាកម្មរថភ្លើងមួយចំនួន ខណៈខេត្ត Fujian បានបង្កើនកម្រិតឆ្លើយតបគ្រាអាសន្នសម្រាប់ទឹកជំនន់ និងព្យុះទីហ្វុង ។

ខណៈពេលនោះដែរ មន្ទីរឧតុនិយមជាតិចិន បានចេញការព្រមានព្យុះភ្លៀងផងដែរនៅតាមតំបន់ជាច្រើននៅភាគអាគ្នេយ៍ប្រទេសចិន និងតាមបណ្តាខេត្តភាគខាងកើត រួមមានខេត្ត Fujian, Zhejiang និងខេត្ត Jiangsu ។

ដោយឡែក មជ្ឈមណ្ឌលហិរញ្ញវត្ថុសៀងហៃរបស់ចិន នឹងប្រឈមនឹងភ្លៀងធ្លាក់ខ្លាំងដ៏អាក្រក់បំផុតក្នុងរយៈពេលជាង ៤០ឆ្នាំកន្លងមកនេះ ។

សូមបញ្ជាក់ថា ព្យុះ Kong-rey បានបោកបក់ដល់ដីគោកនៅតំបន់ឆ្នេរភាគខាងកើតកោះតៃវ៉ាន់នាថ្ងៃព្រហស្បតិ៍នេះ ក្នុងនាមជាព្យុះធំបំផុតគិតពីទំហំ បានវាយប្រហារកោះតៃវ៉ាន់ក្នុងរយៈពេល ៣០ឆ្នាំកន្លងមកនេះ បណ្តាលបិទផ្សារហិរញ្ញវត្ថុ ជើងហោះហើររាប់រយវ៉ុល ត្រូវបានលុបចោល និងការកាត់បន្ថយសេវាកម្មរថភ្លើងផងដែរ ។ មនុស្សម្នាក់ ត្រូវគេរាយការណ៍ថាបានស្លាប់ ពេលដែលរថយន្តរបស់គាត់ បើកបុកដើមឈើបាក់នៅភាគកណ្តាលកោះតៃវ៉ាន់ ៕