ក្រសួងសុខាភិបាលប៉ាឡេស្ទីន រាយការណ៍ថា ការវាយឆ្មក់របស់យោធាអ៊ីស្រាអែលលើជំរំជនភៀសខ្លួន Nur Shams ស្ថិតក្នុងតំបន់កាន់កាប់វ៉េសប៊ែងនាថ្ងៃព្រហស្បតិ៍នេះ បានសម្លាប់ជនប៉ាឡេស្ទីន ២នាក់ រួមទាំងក្មេងម្នាក់ផងដែរ និងមនុស្ស ១០នាក់ផ្សេងទៀត ត្រូវបានចាប់ខ្លួន ។

ពួកគេបន្តថា ជនប៉ាឡេស្ទីនម្នាក់ទៀត ត្រូវបានបាញ់សម្លាប់ដោយកងទ័ពអ៊ីស្រាអែលនៅពេលយប់ នៅជំរំជនភៀសខ្លួន Tulkarm ស្ថិតក្នុងតំបន់វ៉េសប៊ែង ។

កងទ័ពអ៊ីស្រាអែល និយាយនៅថ្ងៃព្រហស្បតិ៍នេះថា ពួកគេបានបើកប្រតិបត្តិការវាយឆ្មក់មានគោលដៅលើហេដ្ឋារចនាសម្ព័ន្ធភេរវកម្មនៅជំរំជនភៀសខ្លួន Nur Shams ។

ទីភ្នាក់ងារព័ត៌មានផ្លូវការប៉ាឡេស្ទីន WAFAបានរាយការណ៍ថា រថយន្តអ៊ីស្រាអែលក្នុងចំនួនដ៏ច្រើនលើសលប់ និងគ្រឿងចក្រ បានវាយប្រហារទីក្រុង និងធ្វើដំណើរឆ្ពោះទៅកាន់ជំរំជនភៀសខ្លួន Nur Shams ។

កងពលតូច Al Quds ដែលជាក្រុមប្រដាប់អាវុធនៃចលនាជីហាដអ៊ីស្លាមប៉ាឡេស្ទីន និយាយនៅក្នុងសេចក្តីថ្លែងការណ៍ថា ពួកគេបានបំផ្ទុះគ្រាប់បែកលើគ្រឿងចក្រយោធាអ៊ីស្រាអែល ដើម្បីរារាំងការវាយឆ្មក់របស់កងទ័ពអ៊ីស្រាអែល ។

ដោយឡែក នៅជំរំ Dura ស្ថិតក្នុងទីក្រុង Hebron កងទ័ពអ៊ីស្រាអែល បើកធ្វើការវាយឆ្មក់ចាប់ខ្លួន ហើយអ្នកដែលត្រូវដោះលែងមានស្នាម និងលេខនៅលើថ្ងាសរបស់ពួកគេ ៕