បាល់ទាត់៖ វត្តមានរបស់ក្រុមហ៊ុនលីគបាល់ទាត់កម្ពុជា បានធ្វើឲ្យអ្នកតាមដានវិស័យកីឡាបាល់ទាត់ជាតិមានការចាប់អារម្មណ៍ជាខ្លាំង ស្របពេលអ្នកជំនាញបានបង្ហាញនូវការគាំទ្រ និងមានសុទិដ្ឋិនិយមខ្ពស់ចំពោះការបង្កើតក្រុមហ៊ុនលីគលើកដំបូងនេះ ដើម្បីជំរុញការអភិវឌ្ឍវិស័យបាល់ទាត់កម្ពុជាមួយកម្រិតទៀត។ លោកព្រឹទ្ធាចារ្យ ប៉ែន ផាត អតីតកីឡាករជម្រើសជាតិកម្ពុជាបានបង្ហាញសុទិដ្ឋិនិយមថា ការបង្កើតក្រុមហ៊ុនលីគបាល់ទាត់កម្ពុជាគឺជារឿងដ៏ល្អ ដើម្បីធ្វើអ្វីថ្មីៗឲ្យបាល់ទាត់ខ្មែរជឿនលឿនទៅមុខជានិច្ច។
ចំណែកលោក ហុក សុចិត្រា អតីតគ្រូបង្វឹកជម្រើសជាតិកម្ពុជា បានចាត់ទុកជាផលវិជ្ជមានសម្រាប់បាល់ទាត់ជាតិដូចគ្នា ពិសេសដើម្បីជំរុញលីគកំពូលកម្ពុជាឲ្យក្លាយទៅជាលីគអាជីពពេញលេញ និងជាឱកាសអភិវឌ្ឍក្លិបបន្ថែម ក៏ដូចជាការទទួលបាននូវអត្ថប្រយោជន៍ផ្សេងៗពីក្រុមហ៊ុមនេះ។ ចំណែកកីឡាករក៏នឹងមានឱកាសប្រកួតប្រជែងកាន់តែច្រើនផងដែរ។ ស្រដៀងគ្នានឹងការលើកឡើងរបស់អតីតកីឡាករ និងគ្រូបង្វឹកក្រុមជម្រើសជាតិកម្ពុជាខាងលើ លោក បែ មករា អគ្គលេខាធិការក្លិបបឹងកេតបានថ្លែងថា ការបង្កើតក្រុមហ៊ុនលីគនេះគឺជាជំហានថ្មីមួយសម្រាប់បាល់ទាត់កម្ពុជា ព្រោះក្រុមហ៊ុននេះបានបង្កើតជាច្រើនប្រទេសមកហើយទាំងក្នុងតំបន់ និងពិភពលោក ដើម្បីគ្រប់គ្រងនូវការបង្កើតព្រឹត្តិការណ៍ផ្សេង និងបទបញ្ញត្តិផ្សេងៗ។ អ្នកចាត់ការក្លិបព្រះខ័នរាជស្វាយរៀង លោក Christopher Grant បានចាត់ទុកថា នេះជាជំហានវិជ្ជមានសម្រាប់បាល់ទាត់នៅកម្ពុជា ខណៈប្រទេសជាច្រើនលើពិភពលោកមានគំរូក្រុមហ៊ុនដូចនេះដែរ។ ចំណែកអ្នកចាត់ការក្រុមភ្នំពេញក្រោន លោក កែវ សុខង៉ន វិញបានសម្ដែងការរំភើប និងរីករាយជាខ្លាំងក្រោយឃើញព័ត៌មានស្ដីពីការបង្កើតក្រុមហ៊ុនលីគ ព្រោះលោកយល់ថា នេះជាជំហ៊ានមួយដ៏ល្អប្រសើរដើម្បីដោះស្រាយបញ្ហានានា ដូចជាការឧបត្ថម្ភ ការប្រកួត និងការងារជាច្រើនទៀតដើម្បីចូលរួមអភិវឌ្ឍបាល់ទាត់ និងក្លិប ពិសេសជំរុញការប្រកួតប្រជែងកាន់តែខ្ពស់ និងមានប្រសិទ្ធភាព។
ដោយឡែកលោក សាប៊ូន វិនតា នាយបច្ចេកទេសក្លិប ISI ដង្កោសែនជ័យវិញក៏មិនខុសពីអ្នកជំនាញផ្សេងទៀតដែរ លោកថា ការបង្កើតក្រុមហ៊ុនលីគបាល់ទាត់កម្ពុជានេះជាផលវិជ្ជមានដ៏ល្អបន្ថែមទៀត សម្រាប់វិស័យបាល់ទាត់កម្ពុជាដើម្បីជំរុញបន្ថែមនូវវឌ្ឍនភាព និងភាពអាជីពនៃលីគកំពូលកម្ពុជាឈានទៅមុខមួយកម្រិតទៀត។ នៅក្នុងវិស័យបាល់ទាត់លើពិភពលោក គេតែងតែនិយាយថា «គុណភាពគ្រូ គុណភាពកីឡាករ និងគុណភាពលីគ គុណភាពជម្រើសជាតិ» លីគមានការប្រកួតប្រជែងខ្លាំងលទ្ធផលសម្រាប់ក្រុមជម្រើសជាតិកាន់តែល្អ។ ចំណែកអ្នកចាត់ការក្លិបបាល់ទាត់ព្រះខ័នរាជស្វាយរៀងលោក Christopher Grant ក៏បានបញ្ចេញពីការយល់ឃើញផងដែរថា នេះជាជំហ៊ានវិជ្ជមានមួយសំរាប់បាល់ទាត់កម្ពុជា ដែលមានស្ថាប័នឯករាជ្យមួយទទួលខុសត្រូវសម្រាប់ការប្រកួតទៅតាមបែបផែន ដែលកំពុងប្រើប្រាស់ស្រាប់នៅតាមបណ្តាលីគធំលើលោក។ ជាក់ស្តែងលោក Satoshi បាននាំមកនូវបទពិសោធក្រាសក្រែលរបស់លោក ដែលយើងសង្ឃឹមថា គ្រប់ភាគីពាក់ព័ន្ធនឹងអាចធ្វើការរួមគ្នាដើម្បីបង្កើនប្រាក់ចំនូលពីការប្រកួត ដើម្បីបន្តការអភិវឌ្ឍន៍បាល់ទាត់កម្ពុជាឆ្ពោះទៅបន្តទៀត។ សូមបញ្ជាក់ថា ក្រុមហ៊ុនលីគបាល់ទាត់កម្ពុជាត្រូវបានសហព័ន្ធកីឡាបាល់ទាត់កម្ពុជា ប្រកាសបង្កើតជាផ្លូវការកាលពីម្សិលមិញដោយតែងតាំងលោក Satoshi Saito ទីប្រឹក្សាសហព័ន្ធកីឡាបាល់ទាត់ពិភពលោក (FIFA) និងជាអតីតអ្នកគ្រប់គ្រងផ្នែកទីផ្សារក្លិប FC Barcelona គឺជានាយកប្រតិបត្តិ ហើយលោកគ្រោងនឹងមកបំពេញការងារផ្ទាល់នៅកម្ពុជានាចុងខែតុលានេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
