មន្ត្រីជាន់ខ្ពស់ក្រុមហាម៉ាស នៅថ្ងៃព្រហស្បតិ៍ (ទី៣១ ខែតុលា) នេះ បាននិយាយថា ក្រុមបដិសេធសំណើណាមួយ ក្នុងគោលបំណងចង់ឲ្យមានការបញ្ឈប់ជាបណ្តោះអាសន្ននូវការប្រយុទ្ធគ្នា ដែលមានរយៈពេលជាង ១ឆ្នាំ នៅតំបន់ហ្កាហ្សា ហើយទទូចឲ្យមានបទឈប់បាញ់យូរអង្វែង។

ប្រមុខដឹកនាំជាន់ខ្ពស់ លោក Taher al-Nunu ដែលមានតួនាទីជាអ្នកនាំពាក្យរបស់ក្រុមហាម៉ាស បានប្រាប់សារព័ត៌មាន AFP ថា៖ «គំនិតឲ្យមានការផ្អាកជាបណ្តោះអាសន្ន ក្នុងសង្រ្គាមនេះ ដែលស្រាប់តែមានការលុកលុយឡើងវិញ នាពេលក្រោយ គឺជាអ្វីដែលយើងបានបង្ហាញជំហររបស់យើងរួចហើយ។ ក្រុមហាម៉ាសគាំទ្រដល់ការបញ្ចប់សង្គ្រាមជាអចិន្ត្រៃយ៍តែប៉ុណ្ណោះ មិនមែនការផ្អាកជាបណ្តោះអាសន្នទេ»។

បើយោងតាមប្រភពដែលដឹងអំពីកិច្ចពិភាក្សានេះ បានប្រាប់សារព័ត៌មាន AFP កាលថ្ងៃពុធ (ទី៣០ ខែតុលា) ថា អ្នកសម្រុះសម្រួលដែលកំពុងប្រឹងប្រែងចរចាឲ្យមានបទឈប់បាញ់ នៅតំបន់ហ្កាហ្សា ត្រូវបានគេរំពឹងថា នឹងស្នើឡើងបទឈប់បាញ់រយៈពេល «តិចជាងមួយខែ» ដល់ក្រុមហាម៉ាស។

ក្នុងលក្ខខណ្ឌមិនបញ្ចេញឈ្មោះដោយសារតែភាពរសើបនៃកិច្ចពិភាក្សានេះ ប្រភពបាននិយាយថា កិច្ចប្រជុំ រវាងប្រមុខទីភ្នាក់រដ្ឋាភិបាលអ៊ីស្រាអែល Mossad លោក David Barnea នាយកទីភ្នាក់ងារស៊ើបការណ៍សម្ងាត់កណ្តាលអាមេរិក លោក Bill Burns និងនាយករដ្ឋមន្ត្រីកាតា នៅទីក្រុងដូហា ដែលបានបញ្ចប់កាលពីថ្ងៃទី២៨ ខែតុលា បានពិភាក្សាគ្នាអំពីការស្នើឲ្យមានបទឈប់បាញ់ «រយៈពេលខ្លី» តិចជាងមួយខែ។

ប្រភពនោះបានបន្ថែមថា សំណើនេះពាក់ព័ន្ធនឹងការដោះដូរចំណាប់ថ្នូរអ៊ីស្រាអែល ជាមួយជនជាតិប៉ាឡេស្ទីន ដែលជាប់ឃុំនៅក្នុងពន្ធនាគាររបស់អ៊ីស្រាអែល និងការផ្ដល់ជំនួយដល់តំបន់ហ្កាហ្សាឲ្យកាន់ច្រើនជាងមុន៕