ក្រុមអ្នកស្ម័គ្រចិត្តគ្រប់ស្រទាប់វណ្ណៈ និងគ្រប់វ័យ នាំគ្នាដាំកូនឈើនៅទូទាំងប្រទេសអ៊ីរ៉ាក់ ក្នុងយុទ្ធនាការមួយមានគោលដៅប្រយុទ្ធប្រឆាំងនឹងបម្រែបម្រួលអាកាសធាតុ និងការឡើងកម្តៅផែនដី ដែលបានក្លាយជាកាតាលីករសម្រាប់វាលរហោឋាននៅក្នុងប្រទេសមួយនេះ ។

នៅក្នុងទីក្រុង Basra ក្រុមអ្នកចូលចិត្តបរិស្ថាន និងក្រុមអ្នកស្ម័គ្រចិត្តដែលចង់ប្រយុទ្ធប្រឆាំងនឹងផលប៉ះពាល់បង្កឡើងដោយសារសីតុណ្ហភាពឡើងខ្ពស់ និងនគរូបនីយកម្ម បានជួបជុំគ្នា្កក្រោមគម្រោង Eternity Project ។

លោក Ali Qassim គឺជាស្ថាបនិកបង្កើតយុទ្ធនាការនេះ និយាយថា ទីក្រុង Basra រងផលប៉ះពាល់ខ្លាំងជាងទីក្រុងណាណាទាំងអស់ ដោយសារបាតុភូតឡើងកម្តៅផែនដី ដែលឡើងដល់ចំណុចមួយនាំឲ្យក្រុមអ្នកព្យាករណ៍ឧតុនិយមមួយចំនួន ចាត់ទុកទីក្រុង Basra ថាជាមាត់ចង្រ្កានសកលលោក ដោយសារការកើនឡើងសីតុណ្ហភាពខ្ពស់ខ្លាំងបំផុត ។

លោក Ali Mhana គឺជាអ្នកស្ម័គ្រចិត្តម្នាក់នៅក្នុងគម្រោង Eternity Project និយាយថា ពួកគេចាប់ផ្តើមជាមួយកូនឈើ ១.១០០ដើម ។

លោកបន្តថា ពួកយើងនឹងបន្តដាំកូនឈើនៅតាមតំបន់រាប់ពាន់កន្លែងផ្សេងទៀតនៅក្នុងទីក្រុងដែលត្រូវការរបាំងការពារបរិស្ថាន ។ ពួកយើងអាចផ្គត់ផ្គង់ទឹកដល់តំបន់វាលខ្សាច់នេះ ហើយនៅរដូវក្តៅ វានឹងរឹងមាំ វានឹងអាចបង្កើតរបាំងបៃតង ដែលជារបាំងការពារបរិស្ថាន ។

ដោយឡែក នាយករដ្ឋមន្រ្តីអ៊ីរ៉ាក់ និងក្រសួងកសិកម្ម សហការណ៍ជាមួយអង្គភាពផ្សេងទៀតនៅក្នុងរដ្ឋាភិបាលអ៊ីរ៉ាក់ បានបើកយុទ្ធនាការដាំកូនឈើផ្សេងៗជាច្រើនទៀតនៅទូទាំងប្រទេសអ៊ីរ៉ាក់ ។

អង្គការសហប្រជាជាតិ(UN)បានចាត់ទុកប្រទេសអ៊ីរ៉ាក់ថាស្ថិតក្នុងចំណោមប្រទេសចំនួន ៥ដែលងាយរងគ្រោះបំផុតដោយសារបម្រែបម្រួលអាកាសធាតុនៅលើសកលលោក ដោយពួកគេបានលើកឡើងពីភាពខ្សត់ទឹក គ្រោះរាំងស្ងួត និងសីតុណ្ហភាពក្តៅខ្លាំង ។

នៅក្នុងរយៈពេលជាច្រើនឆ្នាំកន្លងមកនេះ កសិកម្មអ៊ីរ៉ាក់ បានរងគ្រោះដោយសារកង្វះខាតភ្លៀងធ្លាក់បង្កឡើងពីបម្រែបម្រួលអាកាសធាតុ ទឹកហូរកាន់តែតិចឆ្លងកាត់ទន្លេសំខាន់ទាំង ២របស់ពួកគេ គឺទន្លេ Tigris និងទន្លេ Euphrates ហើយជម្លោះអស់រយៈពេលជាច្រើនទសវត្សរ៍ បានរំខានដល់ការដាំដុះ ៕