រដ្ឋមន្ត្រីការបរទេសអ៊ុយក្រែន លោក អាន់ឌ្រី ស៊ីប៊ីហា (Andrii Sybiha) បាននិយាយកាលពីថ្ងៃព្រហស្បតិ៍ (៣១ តុលា) ថា ទីក្រុងគីវ មានទំនុកចិត្តលើការបន្តការគាំទ្ររបស់សហរដ្ឋអាមេរិក ដោយមិនខ្វល់ថាអ្នកណាជាអ្នកឈ្នះការបោះឆ្នោតប្រធានាធិបតីនៅសប្តាហ៍ក្រោយនោះទេ។

កាលពីដើមខែនេះ បេក្ខភាពប្រធានាធិបតីបក្សសាធារណរដ្ឋ លោក Donald Trump បានស្តីបន្ទោសប្រធានាធិបតីអ៊ុយក្រែន លោក Volodymyr Zelenskiy ចំពោះការជួយចាប់ផ្តើមសង្រ្គាមជាមួយរុស្ស៊ី ដោយនេះបានបន្ថែមលើគំនិតដែលថាបក្សសាធារណរដ្ឋ ទំនងជានឹងកាត់បន្ថយការគាំទ្ររបស់សហរដ្ឋអាមេរិក ចំពោះអ៊ុយក្រែន ប្រសិនបើលោកឈ្នះឆ្នោត។

លោក Sybiha ដែលនិយាយជាភាសាអង់គ្លេសបានប្រាប់អ្នកយកព័ត៌មាននៅទីក្រុង ម៉ុងរ៉េអាល់ (Montreal) នៅពេលសាកសួរពីលទ្ធផលបោះឆ្នោតថា "យើងមានការគាំទ្រខ្លាំងពីទ្វេបក្ស គឺទាំងបក្សសាធារណរដ្ឋ និងបក្សប្រជាធិបតេយ្យ។ ការគាំទ្រដល់អ៊ុយក្រែន មិនមែនជាសប្បុរសធម៌ទេ តែជាការរួមចំណែកក្នុងសន្តិសុខឆ្លងកាត់តំបន់អាត្លង់ទិក ហើយយើងមានទំនុកចិត្តថាការគាំទ្រនេះនឹងត្រូវបានបន្ត»។

លោក Trump បានរិះគន់លោក Zelenskiy ជាញឹកញាប់នៅលើដំណើរយុទ្ធនាការបោះឆ្នោត ខណៈបេក្ខភាពខាងបក្សប្រជាធិបតេយ្យ លោកស្រី Kamala Harris បានសន្យាបន្តគាំទ្រអ៊ុយក្រែន។ បេក្ខភាពទាំងពីររូបកំពុងប្រជែងគ្នាយ៉ាងស្វិតស្វាញសម្រាប់ការបោះឆ្នោតនៅថ្ងៃអង្គារ ០៥ វិច្ឆិកា សប្ដាហ៍ក្រោយនេះ៕