ប្រធានាធិបតីអ៊ុយក្រែន លោក Volodymyr Zelenskyy បាននិយាយនៅក្នុងបទសម្ភាសន៍មួយ ចេញផ្សាយកាលពីថ្ងៃព្រហស្បតិ៍ទី៣១ ខែតុលា ថា សម្ព័ន្ធមិត្តប្រទេសលោកខាងលិចរបស់អ៊ុយក្រែន ពុំបានឆ្លើយតបឱ្យបានគ្រប់គ្រាន់ចំពោះការចូលរួមរបស់ទាហានកូរ៉េខាងជើង ក្នុងសង្គ្រាមរបស់រុស្ស៊ីជាមួយទីក្រុងគីវឡើយ។

ការអត្ថាធិប្បាយនេះ បានធ្វើឡើងបន្ទាប់ពីប្រមុខការពារជាតិសហរដ្ឋអាមេរិក និងកូរ៉េខាងត្បូង បានអំពាវនាវឱ្យទីក្រុងព្យុងយ៉ាង ដកកងទ័ពរបស់ខ្លួនចេញពីប្រទេសរុស្ស៊ី ដោយព្រមានថា ទាហានកូរ៉េខាងជើង ស្លៀកពាក់ឯកសណ្ឋានរុស្ស៊ី កំពុងត្រូវបានដាក់ពង្រាយសម្រាប់សកម្មភាពដែលអាចកើតមានប្រឆាំងកងកម្លាំងអ៊ុយក្រែន។

មេដឹកនាំអ៊ុយក្រែន បាននិយាយនៅក្នុងបទសម្ភាសន៍មួយជាមួយទូរទស្សន៍កូរ៉េខាងត្បូង KBS ថា ប្រធានាធិបតីរុស្ស៊ី លោក វ្ល៉ាឌីមៀ ពូទីន «កំពុងសាកល្បងប្រតិកម្មរបស់ប្រទេសលោកខាងលិច នៃរដ្ឋសម្ព័ន្ធយោធាណាតូ និងប្រតិកម្មរបស់ប្រទេសកូរ៉េខាងត្បូង»។

លោក បាននិយាយបន្ថែមថា ប្រសិនបើគ្មានចំណាត់ការអ្វីទេ លោកគិតថា ប្រតិកម្មចំពោះរឿងនេះគឺគ្មានទាល់តែសោះ វាគឺសូន្យ ដែលចំនួនទាហានកូរ៉េខាងជើងនៅតាមព្រំដែនរបស់យើង នឹងកើនឡើង។

ទីក្រុងសេអ៊ូល បានចោទប្រកាន់កូរ៉េខាងជើងជាយូរណាស់មកហើយថា បានបញ្ជូនអាវុធទៅជួយទីក្រុងមូស្គូដើម្បីប្រយុទ្ធជាមួយទីក្រុងគីវ និងបានចោទប្រកាន់ថា ទីក្រុងព្យុងយ៉ាង បានផ្លាស់ប្តូរដើម្បីដាក់ពង្រាយទាហានជាច្រើន បន្ទាប់ពីមេដឹកនាំរបស់ខ្លួន លោក គីម ជុងអ៊ុន បានចុះហត្ថលេខាលើកិច្ចព្រមព្រៀងការពារជាតិទៅវិញទៅមក ជាមួយលោកពូទីន កាលពីខែមិថុនា។