ក្រុមអ្នកគាំទ្រគណបក្សប្រឆាំងនៅប្រទេសទួរគី បានចេញតវ៉ា កាលពីថ្ងៃព្រហស្បតិ៍ ប្រឆាំងនឹងការចាប់ខ្លួនអភិបាលស្រុក មកពីគណបក្សប្រជាសាធារណរដ្ឋ (CHP) បន្ទាប់ពីរដ្ឋអាជ្ញា បានចោទប្រកាន់លោកថា ជាមនុស្សរបស់គណបក្សពលករឃឺដ (PKK) ដែលត្រូវបានហាមឃាត់ ថាជាក្រុមភេរវករនៅក្នុងប្រទេសទួរគី។

អ្នកគាំទ្ររាប់រយនាក់របស់គណបក្សប្រជាសាធារណរដ្ឋ ព្រមទាំងគណបក្ស DEM ដែលគាំទ្រជនជាតិឃឺដ បានចូលរួមក្នុងការប្រមូលផ្តុំគ្នានេះ។

ការចាប់ខ្លួន លោក Ahmet Ozer អភិបាលស្រុក Esenyurt នៃទីក្រុងអ៊ីស្តង់ប៊ុល បានធ្វើឡើងបន្ទាប់ពីមានការវាយប្រហារលើក្រុមហ៊ុនការពារជាតិរបស់ប្រទេសទួរគី TUSAS ដែលបានសម្លាប់មនុស្ស៥ នាក់ក្នុងទីក្រុងអង់ការ៉ា កាលពីសប្តាហ៍មុន ជាការវាយប្រហារមួយដែលក្រុមគណបក្សពលករឃឺដ (PKK) បានអះអាងទទួលខុសត្រូវ។ វាក៏កើតឡើងផងដែរ ក្នុងពេលមានការពិភាក្សាអំពីការជំរុញសន្តិភាពដោយសម្ព័ន្ធមិត្តជិតស្និទ្ធរបស់ប្រធានាធិបតី លោក Tayyip Erdogan ជាបំណងលើកដំបូងក្នុងរយៈពេលមួយទសវត្សរ៍មកនេះ ដើម្បីបញ្ចប់ជម្លោះរយៈពេល៤០ឆ្នាំរបស់ប្រទេសទួរគី ជាមួយក្រុមសកម្មប្រយុទ្ធឃឺដ។

លោក Ozer បានច្រានចោលការចោទប្រកាន់ពាក់ព័ន្ធនឹងអំពើភេរវកម្ម។ គណបក្សប្រជាសាធារណរដ្ឋ (CHP) បាននិយាយថា គណបក្សនឹងការពារលោក Ozer ប្រឆាំងនឹងអ្វីដែលខ្លួនហៅថា ការចោទប្រកាន់គ្មានមូលដ្ឋាន ដែលបង្ហាញពីការប៉ុនប៉ងចុងក្រោយរបស់រដ្ឋាភិបាលដើម្បីកំណត់គោលដៅលើក្រុមប្រឆាំងតាមរយៈតុលាការ និងបានជំរុញឱ្យប្រជាជនតវ៉ានៅក្នុងស្រុក Esenyurt។