​បាល់ទាត់៖ ​កាលពី​ថ្ងៃទី២ ខែឧសភា​កន្លងទៅ​អង្គការ​ផ្កាយ​សមុទ្រ​កម្ពុជា ISF សហការ​ជាមួយ​ក្រុមហ៊ុន AIA កម្ពុជា និង​ក្លិប​បាល់ទាត់ Tottenham Hotspur របស់​អង់គ្លេស​បាន​ពាក់អាវ​ដែល​បាន​បោះពុម្ព​ជាពិសេស ដោយមាន​និមិត្តសញ្ញា​របស់​អង្គការ​ផ្កាយ​សមុទ្រ​ក្នុងការ​ប្រកួត Premier League ជាមួយនឹងក្លឹប​បាល់ទាត់ Sheffield United​។​

​​អាវ​កីឡា​ដែល​ត្រូវបាន​ពាក់​ក្នុង​ការប្រកួត​ត្រូវ​ចុះហត្ថលេខា​ដោយ​កីឡាករ Gareth Bale និង Heung-min Son ត្រូវ​បានដាក់​ដេញថ្លៃ​ដើម្បី​រៃ​អង្គាស​ថវិកា​ឲ្យ​អង្គការ​ផ្កាយ​សមុទ្រ និង​មូលនិធិ​របស់​ក្លឹប​ Tottenham Hotspur ដែលមាន​គោលដៅ​បង្កើត​ឳ​កាស​នាំមក​នូវ​ការផ្លាស់ប្តូរ​ក្នុង​ជីវិត​ ដល់​ប្រជាជន​ក្នុង​សហគមន៍​មូលដ្ឋាន។​ ​​តាមរយៈ​កិច្ចសហការ​នេះ​ក្លិប​ Tottenham Hotspur បានប្រគល់​អាវ​មួយ​ដែលមាន​ហត្ថលេខា​កីឡាករ​កំពូល​របស់​ក្លិប​ទាំង ២​នាក់​មកឱ្យ​អង្គការ​ផ្កាយ​សមុទ្រ​។​ ​​ដើម្បី​អបអរ​ខួប​ទី១៥ របស់ខ្លួន អង្គការ​ផ្កាយ​សមុទ្រ​នឹង​រៀបចំ​កម្មវិធី​ចាប់ឆ្នោត​ផ្សងសំណាង​ដើម្បី​រៃអង្គាស​ថវិកា ដែលមាន​រយៈពេល​ពេញ​មួយខែ​ដោយ​អ្នកមាន​សំណាង​ក្នុង​កម្មវិធី​នេះ នឹង​ទទួលបាន​អាវ​កីឡា​ដែលមាន​ហត្ថលេខា​កីឡាករ​កំពូល​ទាំង ២​នាក់​នេះ​។ ​​កម្មវិធី​រៃអង្គាសប្រាក់​នេះ​បាន​ចាប់ពី​ថ្ងៃទី១២ ខែតុលា​រហូតដល់​ថ្ងៃទី១០ ខែវិច្ឆិកា​ដោយ​អ្នកចូលរួម​ផ្សងសំណាង​ត្រូវ​ជាវ​សំបុត្រ​ចាប់ពី ១ដុល្លារ​ឡើងទៅ និង​តាម​លក្ខខណ្ឌ​ផ្សេងទៀត​ដែល​បានកំណត់​។

​​ដើម្បី​ជ្រាប​ច្បាស់​ពី​ព័ត៌មាន​បន្ថែមអាច​ចូលទៅ​កាន់​ផេ​ក​ហ្វេ​ស​បុក​ផ្លូវការ​របស់​អង្គការ​ផ្កាយ​សមុទ្រ​។ ​​ការចាប់​ឆ្នោត​ស្វែងរក​ម្ចាស់​អាវ​នឹង​ប្រព្រឹត្តិ​នៅ​ថ្ងៃ​សុក្រ​ ទី​១២ ខែ​វិច្ឆិកា ខណៈ​អ្នកឈ្នះ​នឹង​ទទួល​បាន​ព័ត៌មាន​តាមរយៈ​អ៊ីម៉េល រឺ​ទូរស័ព្ទ ក៏ដូចជា​ប្រកាស​តាម​បណ្តាញ​សង្គម​ផងដែរ​។ ​​ថវិកា​ដែល​ទទួល​បាន​ពី​កម្មវិធី​នេះ​នឹង​ជួយ​ដល់​កុមារ​កម្មវិធី​ស្នូល​ទាំង​បី​របស់​អង្គការ​ផ្កាយ​សមុទ្រ ក្នុង​គោលបំណង​ផ្តល់ឱ្យ​យុវជន​កម្ពុជា​នូវ​មូលដ្ឋានគ្រឹះ​នៃ​ការអប់រំ​ប្រកបដោយ​គុណភាព ពង្រឹង​សុខភាព និង​អាហារូបត្ថម្ភ កសាង​ទំនុក​ចិត្ត និង​ជួយ​ឱ្យ​ពួកគេ​អាច​កសាង​អនាគត​ដ៏​ត្រចះត្រចង់​៕

​អត្ថបទ​នាង សុភា​វុ​ធ