ក្រសួងការបរទេស បាននិយាយកាលពីថ្ងៃព្រហស្បតិ៍ថា ប្រទេសអាល្លឺម៉ង់ នឹងបិទស្ថានកុងស៊ុលអ៊ីរ៉ង់ទាំងបីកន្លែងនៅលើទឹកដីរបស់ខ្លួន ក្នុងប្រតិកម្មចំពោះការប្រហារជីវិតជនជាតិអាល្លឺម៉ង់កាត់អ៊ីរ៉ង់ម្នាក់ ប៉ុន្តែ នឹងអនុញ្ញាតឱ្យស្ថានទូតរបស់ទីក្រុងតេអេរ៉ង់ នៅតែបើក។

រដ្ឋមន្ត្រីការបរទេសអាល្លឺម៉ង់ លោកស្រី Annalena Baerbock បាននិយាយនៅក្នុងទីក្រុងញូវយ៉ក ថា «ទំនាក់ទំនងការទូតរបស់យើង គឺបានធ្លាក់ចុះលើសពីចំណុចទាបរួចទៅហើយ» ។

ប្រទេសអាល្លឺម៉ង់ បានកោះហៅឯកអគ្គរដ្ឋទូតរបស់ខ្លួនប្រចាំប្រទេសអ៊ីរ៉ង់រួចហើយ ជុំវិញការប្រហារជីវិត លោក Jamshid Sharmahd និងបានកោះហៅភារៈធារីអ៊ីរ៉ង់ ឱ្យស្តាប់ពីការតវ៉ារបស់ទីក្រុងប៊ែរឡាំង។

ប្រព័ន្ធផ្សព្វផ្សាយរដ្ឋអ៊ីរ៉ង់ បានរាយកាលពីថ្ងៃចន្ទថា លោក Sharmahd ត្រូវបានគេកាត់ទោសប្រហារជីវិត បន្ទាប់ពីលោកត្រូវបានកាត់ទោសពីបទធ្វើការវាយប្រហារភេរវកម្ម។

លោកស្រី Baerbock បានថ្កោលទោសអ៊ីរ៉ង់ ចំពោះការធ្វើសកម្មភាពនយោបាយជាមួយចំណាប់ខ្មាំង និងបានចោទប្រកាន់ទីក្រុងតេអេរ៉ង់ថា បានព្យាយាមប្រើប្រាស់ការគាំទ្ររបស់អាល្លឺម៉ង់សម្រាប់អ៊ីស្រាអែល នៅក្នុងជម្លោះនៅតំបន់មជ្ឈិមបូព៌ាដែលរាលដាល ដើម្បីបង្ហាញពីភាពត្រឹមត្រូវនៃការសម្លាប់ លោក Sharmahd ។