កូរ៉េខាងជើង នៅថ្ងៃសុក្រ (០១ វិច្ឆិកា) សប្ដាហ៍នេះ បានអួតសរសើរថា មីស៊ីលបាលិស្ទិកអន្តរទ្វីប (ICBM) ថ្មីដែលខ្លួនទើបតែបាញ់សាកល្បង គឺ "ខ្លាំងក្លាបំផុតក្នុងពិភពលោក" ប៉ុន្តែនេះជាការអះអាងដែលត្រូវគេមើលឃើញថាជាការឃោសនាសុទ្ធសាធ បន្ទាប់ពីអ្នកជំនាញបានវាយតម្លៃថា មីស៊ីលនោះមានទំហំធំពេកមិនអាចមានប្រយោជន៍ក្នុងស្ថានភាពសង្រ្គាម។

មីស៊ីល ICBM ដែលបានបាញ់បង្ហោះកាលពីថ្ងៃព្រហស្បតិ៍នោះ បានហោះឡើងខ្ពស់ និងប្រើរយៈពេលយូរជាងអាវុធផ្សេងទៀតដែលកូរ៉េខាងជើងបានសាកល្បង។ ទោះជាយ៉ាងនេះក្ដី អ្នកជំនាញបរទេសនិយាយថា ការធ្វើតេស្តនេះបានបរាជ័យក្នុងការបង្ហាញថា កូរ៉េខាងជើង មានភាពស្ទាត់ជំនាញផ្នែកបច្ចេកវិទ្យាចុងក្រោយមួយចំនួនក្នុងការកាន់កាប់ ICBM ដែលមានមុខងារអាចវាយប្រហារដល់ដីគោកអាមេរិកបាន។

ទីភ្នាក់ងារព័ត៌មានកណ្តាលរបស់កូរ៉េខាងជើង បានកំណត់អត្តសញ្ញាណមីស៊ីលនោះថាឈ្មោះ វ៉ាសុង-១៩ (Hwasong-19) ហើយបានហៅថាជា "មីស៊ីលយុទ្ធសាស្ត្រខ្លាំងបំផុតរបស់ពិភពលោក" និង "ប្រព័ន្ធអាវុធដ៏ល្អឥតខ្ចោះ"។ ប៉ុន្តែអ្នកជំនាញនិយាយថា រូបថតពេលបាញ់បង្ហោះបង្ហាញពី ICBM និងយានបាញ់បង្ហោះរបស់វាមានទំហំធំ ដែលបង្កើតជាចម្ងល់លើការចល័ត និងលទ្ធភាពរស់រានក្នុងសម័យសង្គ្រាមរបស់គ្រឿងយុទ្ធោបករណ៍ទាំងនោះ។

អ្នកជំនាញមីស៊ីលម្នាក់នៅវិទ្យាស្ថានស្រាវជ្រាវយុទ្ធសាស្ត្រជាតិរបស់ទីក្រុងសេអ៊ូលបាននិយាយថា មីស៊ីល Hwasong-19 ត្រូវគេប៉ាន់ស្មានថាមានប្រវែងយ៉ាងតិច ២៨ម៉ែត្រ ខណៈ ICBM ទំនើបរបស់អាមេរិក និងរុស្ស៊ី មានប្រវែងតិចជាង ២០ម៉ែត្រប៉ុណ្ណោះ។

ក្នុងប៉ុន្មានឆ្នាំចុងក្រោយនេះ កូរ៉េខាងជើងបានរាយការណ៍ពីការរីកចម្រើនជាលំដាប់ក្នុងកិច្ចប្រឹងប្រែងរបស់ខ្លួនដើម្បីទទួលបានមីស៊ីលនុយក្លេអ៊ែរ។ អ្នកជំនាញបរទេសជាច្រើនជឿថា កូរ៉េខាងជើងទំនងជាមានមីស៊ីលដែលអាចបាញ់ក្បាលគ្រាប់នុយក្លេអ៊ែរលើទូទាំងកូរ៉េខាងត្បូង ប៉ុន្តែប្រទេសនេះមិនទាន់មានមីស៊ីលនុយក្លេអ៊ែរណាដែលអាចវាយប្រហារដីគោកអាមេរិកនៅឡើយទេ៕