កងកម្លាំងប្រដាប់អាវុធអេហ្ស៊ីបកាលពីថ្ងៃព្រហស្បតិ៍ បានបដិសេធការអះអាងដែលផ្សព្វផ្សាយនៅលើ បណ្តាញផ្សព្វផ្សាយសង្គមថា ពួកគេ បានចូលរួមនៅក្នុងការគាំទ្រប្រតិបត្តិការយោធារបស់អ៊ីស្រាអែល។

កងទ័ព បាននិយាយនៅក្នុងការបង្ហោះនៅលើវេទិកា X ថា៖«ពុំមានទម្រង់នៃកិច្ចសហប្រតិបត្តិការជាមួយអ៊ីស្រាអែលទេ»។

សេចក្តីថ្លែងការណ៍នេះ បានធ្វើតាមការអត្ថាធិប្បាយមុននេះ ពីមជ្ឈមណ្ឌលសារព័ត៌មានរបស់ប្រទេសអេហ្ស៊ីប ដែលដកស្រង់ប្រភពសំខាន់មួយ បានច្រានចោលរបាយការណ៍ប្រព័ន្ធផ្សព្វផ្សាយ ដែលចោទប្រកាន់ថា កំពង់ផែ Alexandria បានទទួលការដឹកជញ្ជូនសម្ភារៈយោធាសម្រាប់អ៊ីស្រាអែល។

របាយការណ៍ បានអះអាងថា នាវាអាល្លឺម៉ង់មួយគ្រឿងឈ្មោះ MV Kathrin បានចូលចតជាមួយកុងតឺន័រចំនួន ៨ ដែលផ្ទុកគ្រឿងផ្ទុះ RDX ប្រមាណ ១៥០.០០០ គីឡូក្រាម ដែលមានបំណងសម្រាប់ឧស្សាហកម្មយោធាអ៊ីស្រាអែល ដែលជាផ្នែកមួយនៃក្រុមហ៊ុនការពារដ៏ធំបំផុតរបស់អ៊ីស្រាអែល Elbit Systems ។

មជ្ឈមណ្ឌលសារព័ត៌មាន បានចាត់ទុលរបាយការណ៍នេះថា មិនពិត ដោយនិយាយថា ពួកគេត្រូវបានផ្សព្វផ្សាយដោយ«សំឡេងប្រឆាំងប្រទេស» ក្នុងគោលបំណងបំផ្លាញការគាំទ្រជាប្រវត្តិសាស្ត្ររបស់អេហ្ស៊ីបសម្រាប់ប្រជាជនប៉ាឡេស្ទីន និងបុព្វហេតុរបស់ពួកគេ។