រដ្ឋមន្ត្រីការបរទេសអ៊ីរ៉ង់ លោក សេយីដ អាបាស អារ៉ាជី (Seyed Abbas Araghchi) និងសមភាគីអាល់ហ្សេរី លោក អាម៉េដ អាត់តាហ្វ (Ahmed Attaf) កាលពីថ្ងៃព្រហស្បតិ៍ បានអំពាវនាវឲ្យមានកិច្ចខិតខំប្រឹងប្រែងប្រកបដោយប្រសិទ្ធភាព ដើម្បីបញ្ឈប់ «អំពើប្រល័យពូជសាសន៍នៅតំបន់ហ្កាហ្សា និងការឈ្លានពានប្រឆាំងនឹងប្រទេសលីបង់» ។

នៅក្នុងការសន្ទនាតាមទូរស័ព្ទ ភាគីទាំងពីរ បានពិភាក្សាអំពីការវិវឌ្ឍចុងក្រោយបង្អស់ នៅក្នុងតំបន់។ នេះបើយោងតាមសេចក្តីថ្លែងការណ៍ដែលចេញផ្សាយដោយក្រសួងការបរទេសអ៊ីរ៉ង់។

សេចក្តីថ្លែងការណ៍ បានឲ្យដឹងថា ស្ថានភាពនៅក្នុងតំបន់ បានក្លាយទៅជាមិនច្បាស់លាស់ ដោយសារតែការវាយប្រហាររបស់អ៊ីស្រាអែលដែលកំពុងបន្តនៅតំបន់ហ្កាហ្សា និងលីបង់ ដោយបានបញ្ជាក់ពីភាពចាំបាច់សម្រាប់សហគមន៍អន្តរជាតិ ក្នុងការចូលរួមក្នុងកិច្ចខិតខំប្រឹងប្រែងប្រកបដោយប្រសិទ្ធភាព និងសម្របសម្រួល ជាពិសេសក្នុងក្របខ័ណ្ឌនៃអង្គការសហប្រតិបត្តិការឥស្លាម ដើម្បីបញ្ឈប់ការវាយប្រហារ។

នៅក្នុងកិច្ចពិភាក្សារបស់ពួកគេ រដ្ឋមន្ត្រីការបរទេសអ៊ីរ៉ង់ បានសរសើរអាល់ហ្សេរីចំពោះជំហររឹងមាំរបស់ខ្លួនក្នុងការគាំទ្រប្រជាជនប៉ាឡេស្ទីន និងលីបង់ និងការថ្កោលទោសចំពោះ «ការឈ្លានពាន» នាពេលថ្មីៗនេះរបស់អ៊ីស្រាអែលប្រឆាំងនឹងអ៊ីរ៉ង់។

កងកម្លាំងការពារអ៊ីស្រាអែល បានប្រកាសកាលពីសប្តាហ៍មុនថា ខ្លួនបានធ្វើការវាយប្រហារតាមអាកាស «យ៉ាងច្បាស់លាស់ និងចំគោលដៅ» ទៅលើគោលដៅនានា ក្នុងប្រទេសអ៊ីរ៉ង់ ដើម្បីឆ្លើយតបទៅនឹងការវាយប្រហារនាពេលថ្មីៗនេះពីប្រទេសនេះ។

ទីបញ្ជាការការពារដែនអាកាសរបស់អ៊ីរ៉ង់ បាននិយាយថា ខ្លួនបានទប់ទល់នឹងការវាយប្រហាររបស់អ៊ីស្រាអែលដោយជោគជ័យ ដែលបណ្តាលឲ្យមាន «ការខូចខាតមានកម្រិត» តែប៉ុណ្ណោះ។