ដោយមិនសូវមានការចាប់អារម្មណ៍ច្រើន ប្រធានាធិបតីអាមេរិក លោក Joe Biden នៅសប្តាហ៍នេះ បានធ្វើជាម្ចាស់ផ្ទះទទួលមេដឹកនាំបរទេសចុងក្រោយរបស់លោក នៅក្នុងការិយាល័យ Oval មុនពេលការបោះឆ្នោតថ្ងៃទី៥ ខែវិច្ឆិកា។ មេដឹកនាំទាំងនោះ បានពិភាក្សាគ្នា អំពីសង្គ្រាមនៅមជ្ឈិមបូព៌ា និងអឺរ៉ុប ហើយបានរៀបចំផែនការ ដើម្បីធ្វើការរួមគ្នា ដើម្បីលុបបំបាត់ការលុកលុយ និងកាត់បន្ថយការរងទុក្ខវេទនា។

ប៉ុន្តែរបៀបវារៈបន្ទាប់បន្សំនៃកិច្ចប្រជុំមុនការបោះឆ្នោតចុងក្រោយនេះ គឺជាការព្រួយបារម្ភ អំពីសុវត្ថិភាពភូមិសាស្ត្រនយោបាយនៃប្រភេទមួយផ្សេងទៀត ជាប្រធានបទដែលមិនបានលើកឡើងនៅក្នុងកំណត់ត្រាផ្លូវការនៃសម័យប្រជុំនេះទេ តែវានៅតែវិលវល់ នៅក្នុងចិត្តគំនិតរបស់មេដឹកនាំទាំងនោះ។ នោះគឺថា តើសហរដ្ឋអាមេរិកនៅតែមានឥទ្ធិពលជាងគេបំផុតក្នុងពិភពលោកក្រោយថ្ងៃទី៥ វិច្ឆិកាដែរទេ? ហើយបើនៅតែមាន តើនឹងឆ្ពោះទៅទិសដៅបែបណា?

ភ្ញៀវបរទេសរបស់លោក Biden បានក្លាយជាប្រធានាធិបតី លោក Nikos Christodoulides នៃសាធារណរដ្ឋស៊ីប ជាប្រទេសកោះតូចមួយ នៅភាគខាងកើតមេឌីទែរ៉ាណេ ដែលមិនសូវជាចាប់អារម្មណ៍លើផ្លូវនៃយុទ្ធនាការ ប៉ុន្តែអាចដើរតួនាទីយ៉ាងសំខាន់ ចំពោះអ្នកណាក៏ដោយដែលក្លាយជាប្រធានាធិបតីបន្ទាប់។ ប្រទេសស៊ីប ដែលធ្លាប់ជាមជ្ឈមណ្ឌលហិរញ្ញវត្ថុសម្រាប់ប្រជាជនរុស្ស៊ី គឺជាចំណុចសំខាន់នៃកិច្ចខិតខំប្រឹងប្រែង ដើម្បីផ្ដាច់ទីក្រុងមូស្គូពីលោកខាងលិច ខណៈដើរតួនាទីការជាផ្លូវដ៏សំខាន់ ក្នុងការផ្ដល់ជំនួយមនុស្សធម៌ទៅកាន់តំបន់ហ្កាហ្សាស្ទ្រីប។

បើយោងតាមសេចក្តីប្រកាសសង្ខេបដែលចេញផ្សាយដោយសេតវិមាន បានឲ្យដឹងថា មេដឹកនាំទាំង២ «ពិភាក្សាគ្នាយ៉ាងស៊ីជម្រៅ លើបញ្ហាគោលនយោបាយការបរទេសជាច្រើនដែលផ្ដល់ប្រយោជន៍ឲ្យគ្នាទៅវិញទៅមក» រួមទាំងសង្រ្គាមរុស្ស៊ី នៅអ៊ុយក្រែន និងសង្រ្គាមអ៊ីស្រាអែលប្រឆាំងនឹងក្រុមហាម៉ាស និងហេសបូឡា។ សេចក្ដីប្រកាសនោះ បានបន្ថែមថា លោក Biden បានសរសើរប្រទេសស៊ីប សម្រាប់ «ការគាំទ្របង្កើតច្រករបៀងមនុស្សធម៌ដែនសមុទ្រ« ដែលផ្តល់អាហាររាប់ពាន់តោន និងជំនួយផ្សេងទៀតដល់តំបន់ហ្កាហ្សា។

តែទោះបីជាយ៉ាងណាក្ដី នៅក្នុងបទសម្ភាសន៍មួយបន្ទាប់ពីសម័យប្រជុំនោះ លោក Christodoulides បានសម្តែងការព្រួយបារម្ភដូចគ្នាដែលបានឮជាញឹកញាប់នៅទ្វីបអឺរ៉ុប និងកន្លែងផ្សេងទៀតនៃពិភពលោក អំពីអ្វីដែលលោករំពឹងថា នឹងជារយៈពេលប្រែប្រួល ដែលកើតមានក្រោយការបោះឆ្នោតនៅថ្ងៃទី៥ ខែវិច្ឆិកា និងអំពីអ្វីដែលនឹងមានអត្ថន័យ ចំពោះសណ្តាប់ធ្នាប់អន្តរជាតិ៕