យន្តហោះចម្បាំងសហរដ្ឋអាមេរិក និងស៊ុយអែត បានហ្វឹកហាត់រួមគ្នា អំឡុងសមយុទ្ធរបស់អង្គការណាតូ ។

យន្តហោះចម្បាំង F-18 របស់សហរដ្ឋអាមេរិក បានហោះចេញពីនាវាផ្ទុកយន្តហោះចម្បាំងនៅសមុទ្រខាងជើង ហោះរំលេងមូលដ្ឋានទ័ពអាកាសស៊ុយអែតនៅទីក្រុង Ronneby ស្ថិតនៅតំបន់ភាគខាងត្បូងប្រទេសស៊ុយអែត និងបានហ្វឹកហាត់ការងារពីទីនោះ និងសហការណ៍ជាមួយយោធាស៊ុយអែតមុនពេលចាកចេញកាលពីថ្ងៃទី ៣១ ខែតុលា ។

ការហ្វឹកហាត់នេះ គឺជាផ្នែកមួយនៃសមយុទ្ធ 'Neptune Strike' របស់អង្គការណាតូ ដែលបានធ្វើឡើងនៅតាមតំបន់ជាច្រើនរបស់អឺរ៉ុប ចាប់ពីថ្ងៃទី ២៤ខែតុលា រហូតដល់ថ្ងៃទី ៣១ខែតុលា និងមានគោលដៅបង្ហាញសមត្ថភាពរបស់សម្ព័ន្ធមិត្ត ក្នុងការចុះប្រតិបត្តិការសមុទ្ររួមគ្នា ។

យោធាស៊ុយអែត និយាយថា យន្តហោះ F-18 ប្រហែល ៦គ្រឿងរបស់សហរដ្ឋអាមេរិក និងបុគ្គលិករបស់ពួកគេ ៥០-៦០នាក់ បានចូលរួមហ្វឹកហាត់នៅមូលដ្ឋានទ័ពអាកាសស៊ុយអែត អំឡុងសមយុទ្ធយោធានេះ ។

លោក Jeffrey Giesler គឺជាមន្រ្តីសហរដ្ឋអាមេរិកទទួលបន្ទុកសមយុទ្ធនៅមូលដ្ឋានទ័ពអាកាសស៊ុយអែត និយាយថា សមយុទ្ធនេះ នឹងអនុញ្ញាតឲ្យយោធាបង្ហាញវិធីដែលពួកគេអាចគាំទ្រគ្នាទៅវិញទៅមក ។

គួរឲ្យដឹងថា ស៊ុយអែត បានចូលរួមអង្គការណាតូកាលពីខែមីនា ឆ្នាំ ២០២៤ ក្រោយការវាយលុករបស់រុស្ស៊ីលើអ៊ុយក្រែន បង្ខំឲ្យពួកគេគិតឡើងវិញពីគោលនយោបាយសន្តិសុខជាតិរបស់ខ្លួន ៕