រដ្ឋបាលឧតុនិយមកូរ៉េ (KMA) នៅថ្ងៃសុក្រ (ទី១ ខែវិច្ឆិកា) នេះ បានប្រាប់ឲ្យដឹងថា នេះគឺជាលើកដំបូងហើយ គិតចាប់តាំងពីឆ្នាំ២០១៧ មក ដែលប្រទេសកូរ៉េខាងត្បូងមិនបានរងគ្រោះដោយសារការបក់បោកដល់ដីគោករបស់ព្យុះទីហ្វុង នារដូវក្តៅនេះ ដោយផ្ទុយស្រឡះពីរយៈពេល ២ឆ្នាំកន្លងមក ដែលប្រទេសនេះបានជួបប្រទះជាមួយនឹងព្យុះធំៗ។

ក្នុងឆ្នាំ២០២៣ ព្យុះទីហ្វុង Khanun បានបង្កឲ្យមានជាទឹកជំនន់ និងបង្ខំឲ្យមនុស្សប្រមាណជា ១៤.០០០នាក់ជម្លៀសចេញពីផ្ទះសម្បែង ហើយព្យុះទីហ្វុង Hinnamnor ក្នុងឆ្នាំ២០២២ បានបណ្តាលឲ្យមនុស្ស ១៤នាក់ស្លាប់ និង ៦នាក់ រងរបួស ព្រមទាំងខូចខាតទ្រព្យសម្បត្តិគិតជា ២៤៤ពាន់លានវ៉ុន (ជាង ១៧៧លានដុល្លារ)។

ផ្ទុយទៅវិញ ព្យុះទីហ្វុង Krathon បានបក់បោកជិតទៅដល់កូរ៉េខាងត្បូង ដោយចាកចេញពីប្រទេសហ្វីលីពីន ជាមួយនឹងកម្លាំងខ្យល់បក់ស្រដៀងនឹងព្យុះទីហ្វុង Kong-rey កាលពីថ្ងៃទី៣ ខែតុលា ប៉ុន្តែបានបាត់បង់សន្ទុះ នៅក្បែរឆ្នេរកោះតៃវ៉ាន់ មុនពេលថមថយកម្លាំងទៅជាព្យុះត្រូពិក។

នៅពេលត្រូវបានសួរថា ហេតុអ្វីបានជាព្យុះទីហ្វុងមិនបានកើតមានឡើងនៅប្រទេស ក្នុងឆ្នាំ២០២៤ នេះ KMA បានប្រាប់សារប័ត៌មាន The Korea Herald ថា នេះគឺដោយសារតែប្រព័ន្ធសម្ពាធខ្ពស់ប៉ាស៊ីហ្វិកខាងជើងដែលបណ្តាលឲ្យមានកម្ដៅក្ដៅខ្លាំង នៅក្នុងខែសីហា។

មន្ត្រី KMA លោក Woo Jin-kyu បាននិយាយថា៖ «សកម្មភាពខ្យល់អាកាស គឺខ្ពស់ជាងធម្មតា ក្នុងឆ្នាំ២០២៤ នៅជិតប៉ាស៊ីហ្វិកភាគពាយព្យនៃប្រទេសហ្វីលីពីន ដែលបណ្តាលឲ្យមានប្រព័ន្ធសម្ពាធខ្ពស់ប៉ាស៊ីហ្វិកខាងជើងក្តៅសើមក្នុងកម្រិតទាបដល់ពាក់កណ្តាលនៃបរិយាកាស ដែលវិវត្តកាន់តែធំជាង និងយូរជាងធម្មតាពីលើប្រទេសកូរ៉េខាងត្បូង។ ព្យុះទីហ្វុងមិនអាចឆ្លងកាត់ប្រព័ន្ធសម្ពាធខ្ពស់នេះទេ ដែលនាំឲ្យព្យុះទាំងនោះធ្វើដំណើរឆ្ពោះទៅកាន់ប្រទេសចិនជំនួសវិញ»៕