ប្រទេសចិន នៅថ្ងៃសុក្រ (ទី១ ខែវិច្ឆិកា) នេះ បានទទូចថា ខ្លួនមិនមានអ្វីត្រូវខ្វល់ខ្វាយនោះឡើយ ចំពោះទំនាក់ទំនងដែលកំពុងមានភាពរីកចម្រើនជាលំដាប់ រវាងទីក្រុងព្យុងយ៉ាង និងទីក្រុងមូស្គូ បន្ទាប់ពីសហរដ្ឋអាមេរិកបានព្រមានថា ទាហានកូរ៉េខាងជើងរហូតដល់ ៨.០០០នាក់ បានទៅដល់តំបន់ព្រំដែនរបស់រុស្ស៊ី ដែលត្រូវបានបណ្តុះបណ្តាល និងត្រៀមខ្លួន ដើម្បីចូលរួមការប្រយុទ្ធនៅក្នុងសង្គ្រាមជាមួយអ៊ុយក្រែន។

អ្នកនាំពាក្យក្រសួងការបរទេសរបស់ទីក្រុងប៉េកាំង លោក Lin Jian បាននិយាយថា៖ «ប្រទេសកូរ៉េខាងជើង និងរុស្ស៊ី គឺជារដ្ឋអធិបតេយ្យភាពឯករាជ្យទាំង២។ របៀបដែលប្រទេសទាំង២ អភិវឌ្ឍទំនាក់ទំនងទ្វេភាគី គឺជាកិច្ចការផ្ទាល់ខ្លួនរបស់ប្រទេសទាំង២»។

ដោយប្រឹងប្រែងស្វែងរកការមានប្រៀប នៅក្នុងការលុកលុយដ៏លំបាករបស់លោកលើអ៊ុយក្រែន ប្រធានាធិបតីរុស្ស៊ី លោក Vladimir Putin បាននាំយកកងទ័ព និងសម្ភារៈយោធាពីកូរ៉េខាងជើង ជាលើកទី១ ដែលរុស្ស៊ីបានសម្រេចឲ្យវត្តមានកងកម្លាំងបរទេស នៅលើទឹកដីរបស់ខ្លួន ក្នុងរយៈពេលជាង ១សតវត្សរ៍។

ប្រធានាធិបតីអ៊ុយក្រែន លោក Volodymyr Zelenskyy បានបរិហារនូវអ្វីដែលលោកហៅថា ភាពអសកម្មរបស់សម្ព័ន្ធមិត្ត ពាក់ព័ន្ធនឹងវត្តមានកងទ័ពកូរ៉េខាងជើង ហើយបាននិយាយថា លោកមានការភ្ញាក់ផ្អើលចំពោះ «ភាពស្ងៀមស្ងាត់» របស់ប្រទេសចិន។

ជាការឆ្លើយតប ទីក្រុងប៉េកាំង បាននិយាយនៅថ្ងៃសុក្រនេះថា ខ្លួនមិនបានដឹងពីស្ថានភាពជាក់លាក់នៃការផ្លាស់ប្តូរ និងកិច្ចសហប្រតិបត្តិការទ្វេភាគី រវាងកូរ៉េខាងជើង និងរុស្ស៊ីនោះឡើយ។ លោក Lin បានលើកឡើងថា៖ «ជំហររបស់ប្រទេសចិនមិនបានផ្លាស់ប្តូរនោះឡើយ ពាក់ព័ន្ធទៅនឹងក្ដីសង្ឃឹម ដែលថា ភាគីផ្សេងៗ នឹងជំរុញដល់ការបន្ធូរបន្ថយស្ថានការណ៍ ហើយធ្វើការដើម្បីឲ្យមានដំណោះស្រាយនយោបាយ ចំពោះវិបត្តិ នៅអ៊ុយក្រែន»៕