បាត់ដំបង ៖ បងប្អូនប្រជាកសិករ នៅស្រុកមោងឫស្សី ខេត្តបាត់ដំបង បានស្នើសុំដល់អាជ្ញាធរ និងក្រសួងពាក់ព័ន្ធទាំងអស់ មេត្តាជួយអន្តរាគមន៍ដល់ពួកគាត់ ខណៈស្រូវកាន់តែចុះថោក ជី និងប្រេង រួមទាំងថ្នាំបាញ់បង្ការស្រូវផ្សេងៗទៀតកាន់តែឡើងថ្លៃ ធ្វើឲ្យពួកគាត់ពិបាកកាន់តែខ្លាំងក្នុងជីវភាពគ្រួសារ។

ថ្លែងប្រាប់ទូរទស្សន៍BTV នារសៀលថ្ងៃទី១៥ ខែតុលា ឆ្នាំ២០២១នេះ បងស្រីម្នាក់ ដែលរស់នៅ ភូមិអង្រ្គង ឃុំជ្រៃ ស្រុកមោងឫស្សី ខេត្តបាត់ដំបង បានលើកឡើងថា ពួកគាត់ស្ទើរតែស្រក់ទឹកភ្នែក ក្រោយពីស្រូវរបស់គាត់ ដែលសេសសល់ពីស្វិត​បន្តិចបន្តួច​យកទៅលក់បានតម្លៃត្រឹម​តែមួយតោន ៧០ទៅ ៧១ម៉ឺនរៀល រីឯជីធ្លាប់តែមួយការ៉ុងតម្លៃ៩ម៉ឺនរៀលទៅ១៤ម៉ឺនរៀល និងប្រេងឡើងថ្លៃរហូតដល់ជាង៤ពាន់រៀល ក្នុងមួយលីត្រឯងណោះ។

បងស្រីបានរៀបរាប់ថា «ស្រូវរបស់គាត់ និងកសិករដទៃទៀតនៅភូមិនេះ(ភូមិអង្រ្គង)ស្វិត ហើយ សល់​ពីស្វិតមកលិចទឹកបន្ថែមទៀត ហើយខំប្រឹងច្រូតទាំងទឹកលិចបានមក យកទៅលក់​បែ​ជា​តម្លៃបានត្រឹមមួយតោន៧០ម៉ឺន។ ចំណែកជីតម្លៃ៩ម៉ឺនឡើងដល់១៤ម៉ឺន តម្លៃ១១ម៉ឺន ឡើងដល់១៦ម៉ឺនរៀល ប្រេងតម្លៃរហូតដល់ជាងបួនពាន់រៀលក្នុងមួយលីត្រ....។ អ្នកស្រែរត់ម៉េចរួចថ្នាំក៏ថ្លៃអ្វីក៏ថ្លៃគ្រប់មុខ ពួកយើងធ្វើសងតែចិនមិនរួចទេ។ ពេលនេះ ម្ចាស់ជីគេលែងឲ្យជឿទៀតហើយ ដោយថៅកែជីគេថា តម្លៃវានៅឡើងថ្លៃតទៅទៀត ដែលអាចអស់ថ្លៃដល់១៨ម៉ឺនរៀលក្នុងមួយការ៉ុង។ ថៅកែគេដឹងថា អ្នកស្រែយើងត្រូវការជីមកដាក់ស្រូវ ដោយអត់មិនបានដូច្នេះគេដំឡើងស្រេចតែគេ។ គិតមើល!ជីកាន់តែថ្លៃ ហើយស្រូវកាន់តែចុះថោក»។

ទាក់ទងនឹងតម្លៃជី និងប្រេងនេះបងប្អូនប្រជាកសិករ បានស្នើសុំដល់អាជ្ញាធរ ក៏ដូចជាស្ថាប័ន​ពាក់ព័ន្ធ​ទាំងអស់មេត្តាជួយសម្រួលដល់ពួកគាត់ផង ខណៈឈ្មួញបានយកលេសក្នុងបរិបទកូវីដ១៩ ហើយមកសង្កត់ករពួកគាត់ ដែលជាកសិករទៅវិញនោះ៕

អត្ថបទ បាន ចក់