ឯកអគ្គរដ្ឋទូតអាមេរិកប្រចាំតំបន់អាក់ទិក បាននិយាយថា សហរដ្ឋអាមេរិកកំពុងតាមមើលយ៉ាងដិតដល់នូវកិច្ចសហប្រតិបត្តិការដែលកំពុងវិវត្តទៅមុខជាលំដាប់ រវាងរុស្ស៊ី និងចិន នៅក្នុងតំបន់អាកទិក ហើយកិច្ចសហប្រតិបត្តិការយោធានាពេលថ្មីៗនេះរបស់ពួកគេ នៅក្នុងតំបន់នេះ បានបង្ហាញនូវ «សញ្ញាគួរឲ្យបារម្ភ»។

គួរបញ្ជាក់ថា ប្រទេសរុស្ស៊ី និងចិនបានបង្កើនកិច្ចសហប្រតិបត្តិការយោធា នៅតំបន់អាកទិក ខណៈដែលកំពុងពង្រឹងទំនាក់ទំនងជារួមផ្សេងៗទៀត ក្នុងប៉ុន្មានឆ្នាំថ្មីៗនេះ ដែលរួមបញ្ចូលទាំងការផ្គត់ផ្គង់របស់ប្រទេសចិនដល់ទីក្រុងមូស្គូនូវទំនិញប្រើប្រាស់បានទាំងផ្នែកស៊ីវិល និងយោធា បើទោះបីជាមានការដាក់ទណ្ឌកម្មពីលោកខាងលិចលើរុស្ស៊ី ជុំវិញសង្គ្រាមនៅអ៊ុយក្រែនក៏ដោយ។

រុស្ស៊ី និងសហរដ្ឋអាមេរិកស្ថិតក្នុងចំណោមប្រទេសចំនួន៨ ដែលមានទឹកដីនៅតំបន់អាកទិកដែលសម្បូរធនធានធម្មជាតិ។ ហើយប្រទេសចិនបានហៅខ្លួនឯងថា ជារដ្ឋ «នៅជិតតំបន់អាក់ទិក» ហើយចង់បង្កើត «ផ្លូវសូត្រប៉ូល» នៅតំបន់អាកទិក ដែលជាផ្លូវដឹកជញ្ជូនថ្មីមួយ នៅពេលដែលស្រទាប់ផ្ទាំងទឹកកក នៅតំបន់ប៉ូលបានថយចុះ ដោយសារសីតុណ្ហភាពកើនឡើង។

លោក Michael Sfraga ឯកអគ្គរដ្ឋទូតពិសេសរបស់សហរដ្ឋអាមេរិកទទួលបន្ទុកកិច្ចការតំបន់អាកទិក បាននិយាយថា «ភាពញឹកញាប់ និងភាពស្មុគស្មាញ» នៃកិច្ចសហប្រតិបត្តិការយោធានាពេលថ្មីៗនេះ រវាងទីក្រុងមូស្គូ និងទីក្រុងប៉េកាំង នៅក្នុងតំបន់ បានបង្ហាញឲ្យឃើញនូវ «សញ្ញាគួរឲ្យបារម្ភ»។

លោក Sfraga បានប្រាប់សារព័ត៌មាន Reuters នៅក្នុងបទសម្ភាសន៍តាមទូរសព្ទពីរដ្ឋអាឡាស្កាថា៖ «ការពិតដែលថា ពួកគេកំពុងធ្វើការជាមួយគ្នា នៅតំបន់អាកទិក បានធ្វើឲ្យពួកយើងចាប់អារម្មណ៍យ៉ាងខ្លាំង។ យើងកំពុងមានទាំងការប្រុងប្រយ័ត្ន និងការយកចិត្តទុកដាក់អំពីរឿងនេះ។ យើងកំពុងតាមដានយ៉ាងដិតដល់នូវការវិវត្តនៃសកម្មភាពរបស់ប្រទេសទាំង២»៕