ទស្សនវិស័យនៃបទឈប់បាញ់ រវាងអ៊ីស្រាអែល និងសត្រូវរបស់ខ្លួន គឺក្រុមហាម៉ាសនិងក្រុមហេសបូឡា បានផ្ទុះឡើងកាលពីថ្ងៃសុក្រ ទី១ ខែវិច្ឆិកា ខណៈការវាយប្រហារតាមអាកាសរបស់អ៊ីស្រាអែលបានសម្លាប់មនុស្សយ៉ាងហោចណាស់៦៤ នាក់នៅតំបន់ហ្កាហ្សាស្ទ្រីប នេះបើយោងតាមក្រុមគ្រូពេទ្យសង្គ្រោះបឋមនៅក្នុងតំបន់ហ៊ុមព័ទ្ធប៉ាឡេស្ទីន និងបានទម្លាក់គ្រាប់បែកនៅជាយក្រុងភាគខាងត្បូងទីក្រុងបេរូត ប្រទេសលីបង់។

កាលពីល្ងាចថ្ងៃសុក្រ យោធាអ៊ីស្រាអែលបាននិយាយថា ខ្លួនបានសម្លាប់មន្ត្រីជាន់ខ្ពស់របស់ហាម៉ាស លោក Izz al-Din Kassab ដោយចាត់ទុក លោកជាសមាជិកជាន់ខ្ពស់ម្នាក់ក្នុងចំណោមសមាជិកជាន់ខ្ពស់របស់ក្រុមហាម៉ាសដែលនៅរស់រានមានជីវិតចុងក្រោយ ទទួលខុសត្រូវក្នុងការសម្របសម្រួលជាមួយក្រុមផ្សេងៗទៀតនៅហ្កាហ្សា ក្នុងការវាយប្រហារតាមអាកាសនៅទីក្រុង Khan Younis ។

បេសកជនអាមេរិក បាននិងកំពុងធ្វើការដើម្បីធានាបានបទឈប់បាញ់នៅព្រំដែនទាំងពីរ មុនពេលការបោះឆ្នោតប្រធានាធិបតីរបស់សហរដ្ឋអាមេរិក នៅថ្ងៃអង្គារ សប្តាហ៍ក្រោយនេះ។

ទូរទស្សន៍របស់ក្រុមហាម៉ាស បានរាយការណ៍កាលពីថ្ងៃសុក្រថា ក្រុមហាម៉ាសមិនគាំទ្របទឈប់បាញ់បណ្តោះអាសន្ននោះទេ។ ក្រុមនេះនិយាយថា សំណើបទឈប់បាញ់ បានបរាជ័យក្នុងការបំពេញលក្ខខណ្ឌរបស់ខ្លួនដែលថា កិច្ចព្រមព្រៀងណាមួយត្រូវតែបញ្ចប់សង្រ្គាមដែលអូសបន្លាយពេញមួយឆ្នាំនៅហ្កាហ្សា និងរួមបញ្ចូលទាំងការដកកងកម្លាំងអ៊ីស្រាអែលចេញពីតំបន់ហ៊ុមព័ទ្ធប៉ាឡេស្ទីន ដែលត្រុវបានបំផ្លិចបំផ្លាញ។

នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា អាទិភាពរបស់លោក គឺការពង្រឹងសន្តិសុខ ទោះបីជាមានសម្ពាធ ឬឧបសគ្គណាមួយក៏ដោយ។